Shvetsııa jahandyq dollarlyq mıllıonerler reıtınginde pozıtsııasyn joǵaltyp keledi

ASTANA. KAZINFORM — Capgemini konsaltıng kompanııasynyń jańa esebine sáıkes, 2024 jyly eldegi baı azamattardyń sany shamamen 3 paıyzǵa azaıyp, 149 500 adam boldy, dep habarlaıdy AZERTADJ.

Bul – Shvetsııada baılar sany qatarynan eki jyl boıy qysqaryp otyrǵan jaǵdaı. Sonymen qatar mıllıonerlerdiń jıyntyq baılyǵy da 0,6 paıyzǵa tómendep, 372 mıllıard dollar bolǵan.

Quldyraýdyń sebepteri retinde eldegi álsiz ekonomıkalyq ósim, paıyzdyq mólsherlemeler naryǵyndaǵy turaqsyzdyq jáne turǵyn úı shyǵyndarynyń artýy ataldy. Bul faktorlar halyqtyń satyp alý qabiletine teris áser etip, kapıtal ósimin tejegen.

Al kórshiles Norvegııa, kerisinshe, senimdi ósim kórsetip otyr: tek 2024 jyldyń ózinde bul elde 5 myń jańa dollarlyq mıllıoner paıda bolǵan.

Jahandyq deńgeıde baı adamdar sany artyp otyr. Pandemııadan keıin baıqalǵan tómendeýden soń, 2024 jyly álem boıynsha mıllıonerler sany 23,4 mıllıon adamǵa jetip, olardyń jalpy baılyǵy 90 trıllıon dollardan asty. Bul ótken jylmen salystyrǵanda 2,6 paıyzǵa kóp.

AQSh áli de dollarlyq mıllıonerler sany boıynsha kósh bastap tur – elde olardyń sany 7,9 mıllıonǵa jetip, bir jylda jarty mıllıon adamǵa artqan.

Azııada Úndistan men Japonııa alda keledi – munda baılar sany tıisinshe 20 myń jáne 210 myń adamǵa kóbeıip, ósim 5,6 paıyz bolǵan. Al Qytaıda, kerisinshe, 1 paıyzǵa tómendeý tirkeldi.

Munaı baǵasynyń quldyraýy Taıaý Shyǵystaǵy mıllıonerler sanynyń 2 paıyzdan astam qysqarýyna sebep bolsa, Latyn Amerıkasynda valıýtalyq turaqsyzdyq pen ekonomıkalyq qıyndyqtar saldarynan bul kórsetkish 8,5 paıyzǵa azaıdy. 

Aıta ketelik baılar úshin salyq mólsheri arta ma degen maǵlumat jarııalaǵan edik.