Shvetsııa Úkimeti Qysqy Olımpıada-2030 ótkizýge ótinim berýdi maquldady

Shvetsııa úkimeti 2030 jylǵy Qysqy Olımpıada oıyndaryn ótkizýge ótinim berý boıynsha eldiń olımpıada komıtetiniń (SOK) bastamasyna qoldaý bildirdi, dep habarlaıdy Kazinform SOK saıtyna silteme jasap.

Bıylǵy aqpan aıynda Shvetsııa 2030 jylǵy aq Olımpıadany uıymdastyrý múmkindigin qarastyryp jatqany týraly málim etilgen edi. Dúnıejúzilik dodany eldiń Stokgolm, Falýn, Ore, Idre jáne Estersýnd qalalary qabyldaı alady. Jarysty ótkizýge múmkindiktiń bar-joǵyna aldyn ala zertteý maýsym aıynda aıaqtalyp, ótinim berý jobasy ekinshi kezeńge ótti.

Shvetsııa Úkimeti ótinim berý úshin SOK-qa qajetti qoldaý men qarjylaı kepildik ýáde etti.

Aıta keteıik, Shvetsııa budan buryn 2026 jylǵy Olımpıada oıyndaryn ótkizýge úmitker elderdiń biri boldy. Alaıda Halyqaralyq olımpıada komıtetinde ótken daýys berý nátıjesi boıynsha bul múmkindikke Italııa qol jetkizdi.

Halyqaralyq Olımpıada komıteti 2030 jáne 2034 jylǵy Qysqy Olımpıada oıyndary ótetin memleketti 2024 jyly anyqtaıtyn bolady.