Shvetsııa Shengen aımaǵyndaǵy shekaralyq baqylaýdy qaıta engizedi
ASTANA. KAZINFORM — Shvetsııa aldaǵy alty aıda Shengen aımaǵyna kiretin ishki shekaralarynda baqylaýdy qaıta engizedi. Buǵan eldiń qoǵamdyq tártibi men ishki qaýipsizdigine tóngen qater sebep bolǵan. Bul týraly Kazinform BBC-ge silteme jasap habarlady.
Bul sheshim týraly Shvetsııa úkimeti málimdedi.
– Buǵan, eń áýeli, Reseıdiń Ýkraınaǵa qarsy keń aýqymdy soǵysy saldarynan Eýropadaǵy qaýipsizdik jaǵdaıynyń kúrdelenýi sebep boldy. Sonyń saldarynan Shengen aımaǵynda gıbrıdti qaýipter kóbeıip, syrtqy kúshterdiń arandatý áreketteri baıqaldy, – delingen Shvetsııa úkimetiniń málimdemesinde.
Shekaralyq baqylaý 12 qarashadan bastap 11 mamyrǵa deıin qoldanylady.
Eske salaıyq, buǵan deıin Qyrǵyzstannyń Memlekettik shekara qyzmeti qyrǵyz-tájik shekarasynyń Batken oblysynan ótetin bóliginde aýqymdy ınjenerlik jumystardy aıaqtaǵanyn habarlaǵanbyz.
