Shvetsııa saıasatkerleri salyq tóleýshiler esebinen keshter uıymdastyrǵan
ASTANA. KAZINFORM — Shvetsııada jarııalanǵan Dagens Nyheter basylymynyń tergeý nátıjeleri boıynsha, eldegi 200-ge jýyq saıasatker aımaqtyq bılik organdaryna sapar, qonaqúı, keshki as jáne partııalyq merekelik is-sharalarǵa jumsalǵan shyǵyndar boıynsha esepterdi joldaǵan.
AZERTADJ habarlaǵandaı, mundaı shyǵyndar salyq tóleýshiler esebinen jabylǵan.
Mamandardyń pikirinshe, bul zańsyz áreket saıası júıege degen senimdi tómendetedi.
Agenttik atap ótkendeı, Hrıstıan demokrattar (HD) erekshe kózge túsken. Bul partııa atynan 500 myń shved kronynan (shamamen 47,5 myń dollar) asatyn esepter jiberilgen. Onyń ishinde úsh túrli taǵamnan turatyn keshki as usynylǵan merekelik kesh te bar. Sharaǵa jergilikti depýtattarmen qatar, parlament músheleri de qatysqan.
Sotsıal-demokrattar arasynda 12 saıasatker aımaqtarǵa shamamen 50 myń kronǵa (shamamen 4,5 myń dollar) esep jibergen. Lıberaldar qatarynan da 12 saıasatker 41 myń kronǵa (shamamen 4 myń dollar) shyǵyn túsirgen.
Orta joldy ustanatyn partııa ókilderi hrıstıan demokrattardan keıingi ekinshi orynda tur. Olardyń 45 múshesi 153 myń kronnan (shamamen 14,5 myń dollar) astam shyǵyndy aımaqtarǵa júktegen. Onyń ishinde alkogoldik ishimdiktermen birge keshki as ta bar.
Hrıstıan demokrattarynyń baspasóz hatshysy Arvıd ıAnssonnyń aıtýynsha, bul partııalyq is-sharalar aımaqtyq jáne mýnıtsıpaldyq saıasatkerlerdi oqytý maqsatynda uıymdastyrylǵan. Alaıda, 35 tarmaqtan turatyn baǵdarlamanyń tek bireýi ǵana aımaqtarǵa qatysty, qalǵandary hrıstıan demokratııasy ıdeologııasy men jas saılaýshylardy tartý taqyryptaryna arnalǵan.
Tsentrıstik partııanyń 24 múshesi 99 myń krondy (shamamen 9,4 myń dollar) aımaqtyq bıýdjetke júktegen.
Jergilikti qarjy dırektorlary qazirgi kezde aımaqtar medıtsına salasyndaǵy mıllıardtaǵan shyǵyndar aıasynda únemdeýge májbúr ekenin moıyndaıdy. Mysaly, 2024 jyly Skone aımaǵy shamamen 4,5 mıllıard kronǵa (shamamen 430 mln dollar) zııan shekse, Estergetland aımaǵynyń shyǵyny 1 mıllıard kronnan (shamamen 95 mln dollar) asqan.
Ákimshilik quqyq professory Olle Lýndın bul jaǵdaıdy múlde jol berýge bolmaıtyn is dep baǵalap, partııalyq is-sharalardyń aımaqtyq qyzmetke qatysy joq ekenin basa aıtty.
Budan buryn Shvetsııa premer-mınıstri Ýlf Krıstersson saıası máseleler boıynsha ártúrli kózqarastar men balama oılardy salystyrý úshin jasandy ıntellektti, sonyń ishinde ChatGPT jáne frantsýzdyq LeChat sııaqty chat-bottardy únemi qoldanatynyn málimdedi. Degenmen Shvetsııa premeriniń áreketi qoǵamda qyzý pikirtalas týǵyzdy.