Shvetsııa men Somalı deportatsııa máselesi boıynsha qupııa kelisim jasaǵan
ASTANA. KAZINFORM — 2023 jyldyń jeltoqsanynda Stokgolm men Somalı úkimeti arasynda qupııa kelisim jasalǵany belgili boldy. Bul týraly Ekot atty Shvetsııa radıosynyń jańalyqtar bólimi habarlady, dep jazady AZERTADJ.
Osy kelisim boıynsha halyqaralyq kómek bıýdjetinen 100 mln shved krony (shamamen 9,2 mln AQSh dollary) Somalı Premer-mınıstri keńsesine qatysty jobalarǵa baǵyttalǵan. Onyń ornyna Somalı Shvetsııadan deportatsııalanǵan azamattaryn keri qabyldaýǵa kelisken.
Kelisim jasalǵannan keıin, Somalıge májbúrli deportatsııalar sany kúrt artqan. Ótken jyly Shvetsııa 28 adamdy Somalıge kúshtep qaıtardy.
Aqparat kózderiniń habarlaýynsha, somalılik tarap qarjylaı kómekti bólý kezinde premer-mınıstrdiń aınalasyndaǵy adamdardyń yqpalyn kúsheıtýdi talap etken. Sonymen qatar, eki el de kelisimdi qupııa ustaýǵa tyrysqan.
Alǵashqy 40 mln kron (3,6 mln dollar) 2024 jyly aýdarylǵan, al qalǵan 60 mln kron (5,5 mln dollar) sol jyldyń jazynda Somalı Premer-mınıstri keńsesi men BUU Damý baǵdarlamasynyń (UNDP) birlesken jobasy arqyly berilgen.
Alaıda, Somalı — álemdegi eń joǵary jemqorlyq deńgeıi bar elderdiń biri, bul jaǵdaı Shvetsııanyń Halyqaralyq yntymaqtastyq jónindegi agenttigi (Sida) tarapynan synǵa ushyraýyna sebep boldy. Sarapshylar bul jobany «joǵary táýekeldi», maqsattary men nátıjeleri «túsiniksiz» dep baǵalady.
Shvetsııanyń syrtqy saýda jáne halyqaralyq yntymaqtastyq mınıstri Benjamın Dýsa kómek pen mıgratsııa arasyndaǵy baılanysty deportatsııalardy kóbeıtý úshin qajet dep túsindirdi. Ol jobany júzege asyrýǵa Sida jáne elshilikter jaýapty ekenin aıtty. Al Sida agenttigi bul jobany óz betinshe qarjylandyrmas edik, úkimettiń talaby bolǵandyqtan qoldadyq dep málimdedi.
Somalı tarapy ázirge eshqandaı pikir bildirmedi.
Aıta keteıik, Ekot bul kelisimdi áshkerelegennen keıin, mınıstr Benjamın Dýsa oppozıtsııanyń talabymen parlamenttiń Syrtqy ister komıtetine shaqyryldy.
Buǵan deıin Shvetsııadaǵy áleýmettik reforma Danııanyń qateligin qaıtalaýy múmkin ekeni aıtyldy.