Shvetsııa mektepteri gadjetterden góri kitapqa basymdyq beredi
ASTANA. KAZINFORM — Shvetsııa mektepteri oqý protsesinde dástúrli ádisterge qaıta oralıaq, atap aıtqanda qaǵaz kitaptardy oqytýǵa basymdyq berilmek. Bul qadam iPad pen noýtbýktardy paıdalaný kezinde oqý deńgeıiniń tómendeýi baıqalǵannan keıin jasaldy, dep habarlaıdy Kazinform agenttiginiń Brıýsseldegi menshikti tilshisi.
Qazirgi tańda basty nazar — kóbirek baspa oqýlyqtaryn paıdalaný, qolmen jazý daǵdylaryn damytý jáne balabaqsha deńgeıinde ekran aldyndaǵy ýaqytty azaıtpaq. Sarapshylardyń aıtýynsha, bul shara oqý qabiletin arttyrýǵa kómektesedi.
Keıbir muǵalimder oqýshylar qaǵaz kitaptar men oqý materıaldaryn kóp suraıtynyn aıtady, óıtkeni olar noýtbýkpen jumys isteýden góri aqparatty tezirek meńgerip, este saqtaıdy.
Bul synyptarda tehnologııany tolyqtaı tyıym etý degendi bildirmeıdi: sandyq qurylǵylar áli de qoldanylady, biraq úkimet kitaptar men oqý quraldaryn satyp alýǵa mıllıondaǵan kron bólýde, dep habarlaıdy BBC.
2000-shy jáne 2010-shy jyldary shved mektepterinde kitaptar synyptan yǵystyrylyp, noýtbýktar men iPad-tarǵa jol berdi. Sol kezde maqsat stýdentterdi tsıfrlyq ómirge daıyndaý bolatyn, biraq áseri kerisinshe boldy.
Shvetsııada 2000 jyldary saýattylyq deńgeıi Eýropa boıynsha aldyńǵy qatarda bolsa, búgin de tómendep barady.
2012 jyly birneshe jyldyq nashar nátıjelerden keıin 15 jastaǵy oqýshylardyń PISA (oqý, matematıka jáne jaratylystaný pánderi boıynsha halyqaralyq test) kórsetkishteri eń tómengi deńgeıge jetti.
Qazir oqýlyqtar synypqa qaıta engizilip, oqý kórsetkishteri qaıta jaqsaryp keledi. 10 jastaǵy balalarǵa arnalǵan ulttyq oqylym baıqaýy bastaldy, al eń kóp kitap oqyǵan synyptar syılyqqa ıe bolady.
Shvetsııa úkimeti sandyq oqý quraldaryn tek olar oqytý protsesine kómekteskende ǵana qoldaný kerek dep sanaıdy.
Dástúrli oqý quraldary oqýshylar men muǵalimder úshin mańyzdy, biraq kóptegen mektepterde áli de qajetti oqýlyqtar jetkiliksiz. 2023 jyly úkimet mektepter men balabaqshalarǵa oqýlyqtar men ádistemelik quraldardy satyp alýǵa arnalǵan jańa memlekettik sýbsıdııa engizdi. 2023 jyly jalpy 685 mıllıon shved krony, 2024 jyly 658 mıllıon, 2025 jyly 755 mıllıon bólindi. 2026 jyldan bastap jyl saıyn 555 mıllıon shved krony qarastyrylǵan.
Jańa mindetti mektep baǵdarlamalary 2028 jyly engiziledi, jáne olardy qoldaý úshin oqýlyqtar men muǵalimderge arnalǵan ádistemelik quraldar qajet bolady. Sol sebepti úkimet 2028 jylǵa arnalǵan oqýlyqtar men ádistemelik quraldardy satyp alý úshin qosymsha 500 mıllıon shved krony bóldi.
Eske salsaq, Danııa úkimeti de adamdardyń kóp oqýy úshin kitapqa 25% salyqty alyp tastaýdy josparlaǵan bolatyn.
Al Almatyda 24 saǵat jumys isteıtin kitaphanalar sany kóbeıetin bolady.