Shvetsııa mektebindegi qarýly shabýyldan bir adam qaza taýyp, úsh oqýshy jaralandy
ASTANA. KAZINFORM — Juma, 21 tamyzda Fagersta qalasyndaǵy (len Vestmanland, Shvetsııanyń ortalyǵy) Brinellskolan orta mektebinde qarýly shabýyl boldy, dep habarlaıdy Kazinform agenttiginiń Eýropalyq Odaqtaǵy menshikti tilshisi.
Shvetsııa polıtsııasynyń málimetinshe, jergilikti ýaqyt boıynsha saǵat 14:06 shamasynda mekteptiń 18 jastaǵy burynǵy oqýshysy «machete» semserimen qarýlanyp ǵımaratqa kirgen. Sodan keıin ol oqýshylarǵa shabýyl jasaı bastady. Oqıǵa saldarynan bir adam qaza tapty. 12 men 17 jas aralyǵyndaǵy kámeletke tolmaǵan úsh balanyń ekeýi aýyr, bireýi jeńil jaraqat aldy. Úshinshisi medıtsınalyq kómek alǵannan keıin úıine jiberildi.
Polıtsııa oqıǵa ornyna birneshe mınýt ishinde jetti. Saǵat 14:16–da quqyq qorǵaý organdarynyń qyzmetkerleri qarý qoldanyp, kúdiktini aıaǵynan jaraqattap, ustady. Oqıǵa ornynda basqa shabýyldaýshylar anyqtalǵan joq.
Shabýyldaýshy qara kıim, dýlyǵa jáne betin búrkegen maska kıgeni habarlandy. Oqıǵa aldynda shabýyldaýshynyń áleýmettik jelidegi akkaýntynda semserdiń sýreti jáne jazba paıda boldy.
18 jastaǵy jasóspirim buryn mektepte zorlyq-zombylyq jasaǵany úshin sottalǵan. Qylmystyń sebebi áli anyqtalǵan joq.
Shvetsııa premer-mınıstri Ýlf Krıstersson men korol Karl XVI Gýstav oqıǵadan zardap shekkenderdiń otbasylaryna kóńil aıtty. Eldiń ádilet mınıstri oqıǵanyń búkil jergilikti qaýymdastyqqa aýyr áser etkenin atap ótti.
Brinellskolan — 16-20 jas aralyǵyndaǵy shamamen 450-470 oqýshysy bar orta mektep (gımnazııa). Oqý jyly birneshe kún buryn bastaldy.
Osyǵan deıin Monakoda turǵyn úıde jarylys bolyp, úsh adam jaraqat alǵanyn jazdyq.
