Shvetsııa qylmystyq jaýapkershilik jasyn 14-ke deıin tómendetti
ASTANA. KAZINFORM – Shvetsııa parlamenti beısenbi kúni qylmystyq jaýapkershilik jasyn 15-ten 14 jasqa deıin tómendetýdi qoldap daýys berdi. Ulttyq saılaý qarsańynda eldiń ońshyl-tsentrıstik úkimeti qylmyspen kúresti kúsheıtýge ýáde berip otyr, dep habarlaıdy Euronews.
Buǵan deıin bılik kámeletke tolmaǵan quqyq buzýshylardy túrmege qamaýǵa bolatyn jasty 13-ke deıin tómendetýdi usynǵan. Alaıda maýsym aıynda parlamentte jetkilikti qoldaý bolmaǵandyqtan bul bastamadan bas tartty.
Qylmystyq jaýapkershilik jasyn 14-ke deıin tómendetýdi 281 depýtat, onyń ishinde oppozıtsııalyq sotsıal-demokrattar qoldady. 66 depýtat qarsy daýys berdi.
Shvetsııa on jyldan astam ýaqyttan beri qylmystyq toptar arasyndaǵy qaqtyǵystarmen, ásirese esirtki naryǵyn baqylaý úshin júrip jatqan básekemen kúresip keledi.
Premer-mınıstr Ýlf Krıstersson basqaratyn konservatıvtik azshylyq úkimeti ásire ońshyl «Shved demokrattary» partııasynyń qoldaýyna súıenedi. Krıstersson úkimeti 2022 jyly bılikke kelgennen beri qylmyspen kúresti negizgi basymdyqtarynyń birine aınaldyrdy.
Úkimet taǵaıyndaǵan arnaıy komıssar qylmystyq jaýapkershilik jasyn 14-ke deıin tómendetýdi usynǵan. Al úkimettiń bastapqy 13 jas týraly usynysyna zań jobasyn talqylaýǵa qatysqan 126 uıymnyń basym bóligi, sonyń ishinde polıtsııa men penıtentsıarlyq qyzmet qarsy shyqty.
Parlament sonymen qatar kámeletke tolmaǵandarǵa jaza merzimin belgileý kezinde qoldanylatyn jeńildikterdi qysqartty. Endi olar 18 jylǵa deıin bas bostandyǵynan aıyrylýy múmkin.
Jańa zań 10 qyrkúıekte, Shvetsııadaǵy jalpyulttyq saılaýǵa úsh kún qalǵanda kúshine enedi.
Demoskop kompanııasynyń Svenska Dagbladet gazeti úshin júrgizgen saýalnamasyna sáıkes, ortalyq-solshyl oppozıtsııa ázirge ońshyl partııalardan alda keledi, biraq aradaǵy aıyrmashylyq qysqaryp jatyr.
Saýalnamada bıleýshi koalıtsııa men ásire ońshyldar 47%, al oppozıtsııalyq partııalar 51% qoldaý jınaǵan.
Aıta keteıik, buǵan deıin Japonııada týdy qorlaýǵa tyıym salatyn zań kúshine engeni habarlandy.
Sondaı-aq Japonııa parlamenti ekinshi astana qurý týraly zańdy maquldaǵanyn da jazdyq.
