Shvetsııa ıpotekalyq nesıe berý talaptaryn jeńildetedi

ASTANA. KAZINFORM – Shvetsııa úkimeti turǵyn úı satyp alýdy jeńildetýge baǵyttalǵan reformany usyndy. Bul ózgerister, ásirese, jastar men balaly otbasylar úshin tıimdi bolmaq, dep jazdy Azertadj.

Jańa erejeler 2026 jyldyń 1 sáýirinen bastap kúshine enedi. Reforma aıasynda ıpotekalyq nesıe lımıti ulǵaıtylyp, qaryzdy jedel óteýge qatysty qatań talap alynyp tastalady.

Jańa tártipke sáıkes, endi turǵyn úı alýshylar jyljymaıtyn múlik qunynyń 90 paıyzyna deıin nesıe ala alady. Buǵan deıin bul kórsetkish 85 paıyzdy quraıtyn. Sonyń nátıjesinde bastapqy jarna kólemi 10 paıyzǵa deıin tómendeıdi. Sonymen qatar qaryz mólsheri jyldyq tabystan 4,5 ese asatyn azamattarǵa qatysty nesıeni jedel óteý mindeti joıylady. Degenmen negizgi amortızatsııa talaptary saqtalady.

Úkimet bul ózgerister úı sharýashylyqtarynyń aı saıynǵy qarjylyq júktemesin aıtarlyqtaı azaıtady dep otyr. Máselen, jeke úıde turatyn balaly otbasy aıyna birneshe júz dollar únemdeı alady. Al jastar úshin bastapqy jarna jınaý merzimi 2–4 jylǵa qysqarady.

Alaıda sarapshylar reformanyń turǵyn úı baǵasynyń ósýine ákelýi múmkin ekenin eskertedi. Boljam boıynsha, 2026–2027 jyldary baspana baǵasy jyl saıyn 5–6 paıyzǵa qymbattaýy yqtımal. Bul halyqtyń qaryz júktemesiniń artýyna alańdaýshylyq týǵyzyp otyr.

Osyǵan baılanysty bılik teńgerimdi sharalar qabyldaýǵa ýáde berdi. Atap aıtqanda, barlyq nesıeler boıynsha amortızatsııany yntalandyrý, qosymsha qaryz alýǵa shekteý qoıý, bankterdiń kapıtaldyq rezervterine qoıylatyn talaptardy kúsheıtý jáne qarjylyq turaqtylyqty qamtamasyz etýde Shvetsııanyń ortalyq banki — Rıksbanktiń rólin arttyrý kózdelgen.

Aıta keteıik, shvedter bıyl merkelik syılyqqa kóbirek aqsha jumsaýǵa nıetti ekenin jazǵan edik.