Shvetsııa – Eýroodaqta kún energııasyna salyq salatyn jalǵyz el

Shvetsııa – Eýropalyq Odaqtaǵy jalǵyz memleket, onda bir ǵımarattyń ishinde óndirilip, sol jerde tutynylatyn kún energııasyna salyq salynady, dep habarlaıdy AZERTADJ.

Bul týraly Shvetsııanyń Kún energetıkasy qaýymdastyǵy (Svensk Solenergi) men Jyljymaıtyn múlik ıeleri uıymynyń (Fastighetsägarna) birlesken jańa esebinde aıtyldy.

Bul talap qýaty 500 kVt-tan asatyn kún panelderine qatysty. Osy shekten asqan jaǵdaıda, óndirilgen elektr energııasynyń barlyǵyna salyq salynady, tipti ol elektr jelisine qosylmasa da.

NREP energetıkalyq kompanııasynyń sarapshylary mundaı jaǵdaı iri kún energetıka jobalaryn ekonomıkalyq turǵydan tıimsiz etedi dep esepteıdi.

— Biz shatyrǵa 2500 kVt-qa deıin kún panelderin ornatýǵa múmkindik bola tura, sanaly túrde qýatty 500 kVt-pen shekteýge májbúrmiz. Bul klımattyq maqsattardy kózdeıtin Shvetsııa úshin aqylǵa qonbaıtyn jaǵdaı, — deıdi sarapshylar.

NREP mysal keltiredi: qýaty 500 kVt bolatyn qondyrǵyǵa jyl saıyn shamamen 190 myń shved krony (shamamen 18 myń dollar) kóleminde salyq salynady. Bul soma onyń jyldyq qyzmet kórsetý shyǵyndarynan segiz ese joǵary.

— Bul óz baqshańda qyzanaq ósirip, ár jegen saıyn salyq tóleýmen teń. Bul qısynsyz ári ádiletsiz, — dep synady salyq saıasatyn Svensk Solenergi uıymynyń basshysy Anna Verner.

Esepte Germanııa, Nıderland, Danııa, Ispanııa jáne Aýstrııa sııaqty elderde bir ǵımarat ishinde óndirilip, tutynylatyn kún energııasy salyqtan tolyq bosatylǵany aıtylǵan.

Eýropalyq komıssııa da birneshe ret EO elderin shaǵyn kún elektr stantsııalaryna qoıylatyn artyq salyqtar men ákimshilik kedergilerdi alyp tastaýǵa shaqyrǵan. Jańartylatyn energııa kózderi jónindegi jańartylǵan dırektıvada bul túrdegi elektr energııasy salyq pen ákimshilik tosqaýyldardan bosatylýy kerek ekeni naqty kórsetilgen.

Alaıda Shvetsııa buǵan kerisinshe baǵytta áreket etip jatyr. 2025 jyldyń 1 qańtarynan bastap elde elektr energııasyna salynatyn salyq mólsheri 1 kVt⋅saǵ úshin 49,3 ere (shamamen 0,047 dollar) deńgeıine deıin ósedi. Al 2026 jyldan bastap shaǵyn óndirýshilerge beriletin salyqtyq jeńildik múlde joıylady.

Sarapshylardyń pikirinshe, bul kún panelderin ornatýǵa degen yntany odan ári tómendetip, úlken ǵımarattardyń shatyrlary paıdalanylmaı bos qalýyna alyp keledi.

Aıta ketelik Shvetsııada mektep reformasy: daıyndyq synyptary joıylyp, on jyldyq oqý engiziletini týraly jazǵan edik.