Shvetsııa eline oralǵysy keletin mıgranttarǵa jeńildikterdi kóbeıtedi

ASTANA. KAZINFORM — Shvetsııa úkimeti mıgranttarǵa erikti túrde oralǵany úshin járdemaqy kólemin arttyrady, dep habarlaıdy AZERTADJ. 

Tólem bir adamǵa 10 000 kronnan (925 dollar) 350 000 kronǵa (32 400 dollar) jáne otbasyna eń kóbi 600 000 kronǵa (55 600 dollar) deıin ulǵaıtyp otyr.

Shvetsııanyń kóshi-qon agenttiginiń baıandamasynda kórsetilgendeı, qarjy azamattardyń otanyna oralý týraly sheshim qabyldaýynda mańyzdy ról atqarmaı otyr. Saýalnamaǵa qatysqan respondentterdiń kópshiligi (61%) Shvetsııada qalýǵa nıetti, tek 18% mıgrant óz eline qaıtyp oralýdy qarastyrady. Mıgranttar úshin emotsııalyq faktorlar óte mańyzdy. Olar qaýipsizdikti, otbasymen qaıta qaýyshý múmkindigi men eline qaıtyp oralǵan kezde qoldaýdy sezingisi keledi.

Agenttik málimetinshe, aqparattyq naýqanǵa 3,5 mıllıon kron ($324 000) jumsalǵanymen, bıyl 111 ótinish túsip, tek bir adam járdemaqy alǵan.

Úkimettiń erikti túrde elge oralý máselesindegi yntymaqtastyqqa Iokmokk mýnıtsıpalıteti kelispedi.

— Bizge kommýnada turatyn barlyq adam qajet. Biz kóp bolǵandy qalaımyz, — dedi mýnıtsıpalıtet basshysy Roland Boman.

Iokmokkten keıin kóptegen mýnıtsıpalıtetter jumys kúshin joǵaltýdan qorqyp, baǵdarlamaǵa qatysýdan bas tartty.

Kóshi-qon mınıstri Iohan Forsell bul baǵdarlama erikti túrde júzege asatynyn jáne qazirdiń ózinde ıntegratsııalanǵan mıgranttarǵa emes, úıine qaıtqysy keletinderge arnalǵanyn aıtty.

Buǵan deıin Shvetsııa úkimeti eńbekaqy salyǵyn azaıtýǵa nıetti ekenin jazǵan bolatynbyz.