Shvetsııa derekterdiń taralý qaýpine baılanysty ChatGPT pen Claude qoldanýǵa shekteý qoıdy
ASTANA. KAZINFORM — Shvetsııada 26 qazannan bastap úkimet apparaty qyzmetkerlerine jumys kompıýterlerinde ChatGPT pen Claude qoldanýǵa shekteý engizildi. Mundaı sheshim qupııa aqparattyń qaýipsizdigine qatysty alańdaýshylyqqa baılanysty qabyldandy, dep habarlaıdy Euronews.
Endi úkimet mekemeleriniń qyzmetkerleri jumys kompıýterlerinen OpenAI kompanııasynyń ChatGPT jáne Anthropic kompanııasynyń Claude servısteriniń braýzerlik nusqalaryn paıdalana almaıdy.
Bul sheshim Shvetsııanyń Kólik basqarmasynda jasandy ıntellekt quraldarynyń qoldanylýyna júrgizilgen tekserýden keıin qabyldandy. Buǵan deıingi aýdıt barysynda atalǵan servısterdi qyzmettik mindetterdi oryndaý kezinde paıdalanýǵa qatysty máseleler anyqtalǵan.
Bılik ókilderi derekterdi qorǵaý jóninde tıisti kelisimder bolmaǵan jaǵdaıda, jasandy ıntellekt júıelerine engizilgen qupııa málimetter saqtalyp, modelderdi odan ári oqytý úshin paıdalanylýy múmkin dep qaýiptenedi.
Shvetsııa úkimeti keńsesiniń tsıfrlandyrý jónindegi dırektory Mıkael Vetterkrantstyń aıtýynsha, memleket maquldamaǵan platformalardy paıdalaný aqparattyq qaýipsizdikke qater tóndirýi múmkin.
Balama retinde qyzmetkerlerge Microsoft Copilot servısin paıdalaný usynyldy. Bul qural qaýipsizdik tekserýinen ótken jáne Microsoft kompanııasy men Shvetsııa bıligi arasyndaǵy derekterdi qorǵaý týraly kelisim aıasynda qoldanylady.
Degenmen ChatGPT pen Claude servısterinen tolyq bas tartý kózdelmegen. Qyzmetkerlerdiń shekteýli toby Shvetsııa bıligi ázirlegen, jasandy ıntellekt kómekshilerine arnalǵan arnaıy qorǵalǵan platforma arqyly bul júıelerdi paıdalanýdy jalǵastyra alady.
Shvetsııanyń Sveriges Radio qoǵamdyq habar taratý qyzmetiniń málimetinshe, osyndaı shekteýler eldiń Salyq basqarmasy men Májbúrlep emdeý jónindegi ulttyq basqarmasynda da qoldanylady. Al Shvetsııanyń Sot oryndaýshylary qyzmeti de osyndaı sharalardy engizý múmkindigin qarastyryp jatyr.
ChatGPT pen Claude, sondaı-aq Qytaıdyń DeepSeek platformasy aqparattyq qaýipsizdik talaptaryna baılanysty Shvetsııa úkimeti apparaty qyzmetkerlerine tikeleı paıdalanýǵa ruqsat etilmegen jasandy ıntellekt servısteriniń qataryna kiredi.
Buǵan deıin OpenAI kompanııasy ChatGPT paıdalanýshylarynyń 53 sýreti JI agentteri arqyly tarap ketkenin málimdedi.
