Shvetsııa deportatsııalanbaıtyn qylmyskerlerge arnalǵan talaptardy qatańdatpaq

ASTANA. KAZINFORM — Shvetsııa úkimeti qylmystyq áreketterge qatysy bar, biraq ártúrli sebeptermen elden shyǵaryp jibere almaıtyn adamdarǵa arnalǵan talaptardy qatańdatýǵa baǵyttalǵan zań jobasyn usyndy, dep habarlaıdy AZERTADJ.

Jańa usynys boıynsha, mundaı adamdarǵa elde ómir súrý jáne jumys isteý áldeqaıda qıyn bolady.

Qazirgi ýaqytta olardyń kópshiligi ýaqytsha turýǵa ruqsat alady. Bul olarǵa turǵyn úıge, jumysqa, áleýmettik tólemderge qoljetimdilik jáne Eýropalyq Odaq ishinde erkin qozǵalý múmkindigin beredi. Al jańa modelde elden shyǵarý keıinge qaldyrylyp, ýaqytsha turýǵa ruqsat tek erekshe jaǵdaılarda beriledi.

Jańa erejelerge ushyraıtyn adamdar halyqtyq tirkeý júıesine ene almaıdy, áleýmettik jeńildikterge qol jetkize almaıdy jáne jumys isteı almaıdy.

Sondaı-aq olar Mıgratsııalyq qyzmet ortalyqtarynyń birinde turyp, únemi esep berip, belgilengen aýmaqtan shyqpaýǵa mindetti bolady. Erejelerdi buzý aıyppul nemese túrme jazasymen qýdalanady.

Mıgratsııa mınıstri Iohan Forsell reformanyń maqsaty — qylmys jasaǵan jáne deportatsııaǵa sheshim qabyldanǵan adamdardyń elde ómir súrýin qıyndatyp, kópshiligin óz erkimen Shvetsııadan shyǵýǵa ıtermeleý ekenin atap ótti.

Úkimettiń baǵalaýynsha, jańa erejeler jyl saıyn shamamen 200 adamǵa áser etedi. Ózgerister 2026 jylǵy 1 mamyrdan bastap kúshine enedi.

Budan buryn Shvetsııa aýyr qylmys jasaǵandardy Sırııaǵa kúshtep jiberetinin jazǵanbyz.