Shvetsııa burynǵy ofıtserleriniń áskerge shaqyrylý jasyn 47-den 70-ke deıin ulǵaıtpaq

ASTANA.KAZINFORM - Shvetsııa qarýly kúshteriniń burynǵy ofıtserleriniń áskerge shaqyrylý jasyn 47-den 70-ke deıin ulǵaıtý kerek. Bul týraly ulttyq qarýly kúshterdiń bolashaqtaǵy kadrlyq quram máselesin zerttegen úkimettik komıssııanyń qorytyndysynda aıtylǵan, dep habarlaıdy TASS.

Bul aldaǵy jyldarda qarýly kúshter aýqymyn nyǵaıtý baǵdarlamasyna baılanysty usynyldy. Parlamenttik partııalar jyldyq bıýdjetti ulǵaıtýǵa qosymsha 300 mıllıard kron (31,4 mıllıard dollar) bólýge kelisti.

Qazirgi ýaqytta áskerı boryshyn ótegen nemese áskerı bilim alǵan azamattar 47 jasqa deıin shaqyryla alady. Sońǵy áskerı daıyndyqtan ótkenine 10 jyldan asqandar áskerı esepten shyǵarylady. Bul ereje engizilgennen keıin myńdaǵan burynǵy áskerı qyzmetshiler shaqyrý tiziminen shyǵaryldy.

Jańa jaǵdaıǵa baılanysty komıssııa bul normadan bas tartyp, burynǵy ofıtserlerdiń shaqyrylý jasyn 47-den 70-ke deıin kóterýdi usynyp otyr.Bul áskerı boryshyn ótegen nemese keminde bir jyl zapastaǵy áskerı qyzmetshilerge qatysty.

Aıta keteıik, Shvetsııanyń ulttyq qaýipsizdik keńesshisi taǵaıyndalǵanyna nebári birneshe saǵat ótkende otstavkaǵa ketti.