Shvetsııa bıyl kúzde eń aýqymdy reformalar paketin usynbaq

ASTANA. KAZINFORM — Shvetsııa úkimeti bıylǵy kúzde jalpy quny 80 mlrd shved kronyna (shamamen 7,4 mıllıard AQSh dollaryna) teń keletin rekordtyq reformalar paketin qamtıtyn bıýdjet jobasyn jarııalaıdy, dep habarlaıdy AZERTADJ.

Bul soma pandemııa jyldaryn esepke almaǵanda, el tarıhyndaǵy eń iri qarjylyq reforma bolyp otyr.

Shvetsııanyń qarjy mınıstri Elızabet Svantessonnyń aıtýynsha, mundaı aýqymdy bıýdjet retsessııa jaǵdaıynda ekonomıkany jandandyrý qajettiliginen týyndaǵan. Bıýdjettiń basty baǵyty — halyqtyń ál-aýqatyn qoldaý. Otbasylar men jumys isteıtin azamattarǵa, sondaı-aq múmkin bolsa, bızneske de salyqtyq jeńildikter qarastyrylmaq.

Alaıda oppozıtsııa tarapynan úkimetke syn aıtylyp jatyr. Sotsıal-demokrattar kabınet ekonomıkany baqylaýdan shyǵaryp aldy jáne taǵy da bıýdjet tapshylyǵyna ákelýi múmkin dep esepteıdi. Al Tsentrıstik partııa úkimettiń jumyssyzdyqty azaıtý, ekonomıkalyq ósimdi yntalandyrý jáne kómirtegi qaldyqtaryn qysqartý boıynsha naqty strategııasy joq ekenin alǵa tartyp otyr.

Reforma paketin qarjylandyrý úshin memleketke qaryz alý qajet bolady. Degenmen, Svantesson bul qadamdy daǵdarys jaǵdaıynda oryndy jáne bıýdjettik erejelerge saı dep esepteıdi.

Bul — qazirgi úkimet quramynyń saılaýǵa deıingi sońǵy bıýdjeti, sol sebepti kóptegen sarapshy bul bastamadan saılaýshylar arasyndaǵy qoldaýdy kúsheıtýge baǵyttalǵan saıası qadam kórip otyr.

Buǵan deıin habarlanǵandaı, Shvetsııa saıasatkerleri salyq tóleýshiler esebinen keshter uıymdastyrǵan.