Shvetsııa azamattyq alý talaptaryn qatańdatty

ASTANA. KAZINFORM - Rıksdag Shvetsııada azamattyq alý tártibin ózgertetin túzetýler paketin qabyldady, dep habarlaıdy Kazinform-nyń Eýropalyq odaqtaǵy menshikti tilshisi.

Qujatqa sáıkes, elde natýralızatsııa talaptary barlyq negizgi baǵyttar boıynsha kúsheıtildi. Atap aıtqanda, elde turý merzimi men úmitkerdiń tabys deńgeıine qoıylatyn talaptar qaıta qaraldy.

Engizilgen ózgeristerdiń biri — turaqty turý merzimine qatysty talap. Buǵan deıin shetel azamattaryna bes jyl turý jetkilikti bolsa, endi bul merzim segiz jylǵa deıin uzartyldy.

Osylaısha, Stokgolm natýralızatsııa máselesinde Eýropalyq odaqtaǵy konservatıvti elderdiń tájirıbesine jaqyndaı tústi.

Sonymen qatar úmitker Shvetsııa ekonomıkasyna úles qosa alatynyn dáleldeýi tıis. Jyldyq eń tómengi tabys kólemi 241,8 myń shved kronyn (shamamen 22 myń AQSh dollary) quraýy qajet. Budan bólek, salyq nemese áleýmettik tólemder boıynsha bereshegi bolmaýy shart.

Shvetsııanyń qazirgi tarıhynda alǵash ret mindetti keshendi test engizilip otyr. Endi 16 jastan asqan tulǵalar shved tilin erkin meńgergenin, sondaı-aq qoǵamtaný negizderin biletinin rastaýy tıis. Bul talaptarǵa demokratııalyq qundylyqtar men konstıtýtsııalyq quqyqtardy túsiný de kiredi.

Zań avtorlarynyń pikirinshe, azamattyq — tek quqyq emes, qoǵam aldyndaǵy jaýapkershilik.

Reformanyń mańyzdy tustarynyń biri — ótpeli kezeńniń qarastyrylmaýy. Jańa talaptar 2026 jylǵy 6 maýsymnan bastap kúshine enedi.

Bul ózgerister buǵan deıin ótinish bergen, alaıda áli jaýap almaǵan shetel azamattaryna da qatysty bolady.

Túzetýlerdiń basym daýyspen qabyldanýy (258 depýtat qoldaǵan) Shvetsııanyń ıntegratsııa saıasatyn kúsheıtý baǵytyn aıqyndaıdy. Elde azamattyq endi avtomatty artyqshylyq emes, qoǵamǵa beıimdelýdiń nátıjesi retinde qarastyrylady.

Aıta keteıik, osyǵan deıin Túrkııa sheteldikterdiń turaqty turýyna beriletin ruqsat qunyn qymbattatty.