Shvetsııa áıelderge qaýip tóndiretin erlerdi júıeli túrde anyqtaýǵa kiristi

ASTANA. KAZINFORM — Shvetsııada áıelderge qarsy zorlyq-zombylyqqa jol bermeý úshin qaýipti erlerdi júıeli túrde anyqtaý bastaldy, dep habarlaıdy AZERTADJ.

Shvetsııada jyl saıyn myńdaǵan áıel zorlyq-zombylyqqa ushyrap, shamamen on adam qaza tabady. Osyndaı aýyr qylmystardyń aldyn alý maqsatynda polıtsııa jaqyndaryna qaýip tóndiretin erlerdi júıeli túrde anyqtaýdy bastady.

Agenttik habarlaýynsha, zertteýlerge sáıkes, polıtsııa qaýipti erlerdi izdegende keıbir belgilerdi eskeredi. Oǵan erlerdiń ózin-ózi óltirýge áreket jasaýy nemese ony jasaý qaýpi jáne qurbandy tunshyqtyrý oqıǵalary jatady.

Polıtsııa qaýipti erlerdi tórt kategorııaǵa bólip qarastyrady:

• Hronıkter — eń kóp taralǵan top. Uzaq ýaqyt boıy turmystyq zorlyq-zombylyq jasaǵan, syrttaı tártipti ómir súretinder.

• Kórinbeıtinder — kóbinese kisi óltirýshiler arasynda kezdesedi. Polıtsııada olar týraly málimet bola bermeıdi, basqa qylmystyq toptarǵa qaraǵanda jasy úlkenirek jáne keıde psıhıkalyq problemalary bolýy múmkin.

• Mýltıkrımınaldy — eń az top, qylmystyq tarıhy keń jáne kóptegen qurbandary bar.

• Konflıktige beıim keletinder — eń jas top, olar jıi zorlyq jasaıdy jáne sezimine berilip áreket etedi, bul minezderi tek úıde emes, basqa jerlerde de baıqalady.

Polıtsııanyń orynbasary Stefan Hektordyń aıtýynsha, ár topqa ártúrli sharalar qoldaný kerek. Mysaly, «hronıkterge» jaqyndaýǵa tyıym salý tıimdi bolsa, «kópqylmystyqtar» dıalogqa jaqsy jaýap bermeıdi. 

Ol kóptegen eń qaýipti erler quqyq qorǵaý organdaryna baıqalmaı qalatynyn, sondyqtan polıtsııa, medıtsınalyq qyzmetkerler jáne áleýmettik qyzmettiń birlesken jumysy asa mańyzdy ekenin atap ótti.

Budan buryn Germanııada áıelderge qatysty zorlyq-zombylyq jaǵdaılary kóbeıgenin jazǵanbyz.