Shvetsııa aýyr qylmys jasaǵandardy Sırııaǵa kúshtep jiberedi

ASTANA. KAZINFORM — Shvetsııa úkimeti Sırııaǵa kóbirek sottalǵan qylmyskerlerdi jiberýdi josparlap otyr, dep habarlaıdy AZERTADJ.

Mıgratsııa mınıstri Iohan Forssel men damý jáne syrtqy saýda mınıstri Benjamın Dýsa el bıligi aýysqannan keıin Sırııaǵa barǵan alǵashqy shved sheneýnikteri boldy.

Sapar barysynda olar Shvetsııada qylmys jasady dep sottalǵan sırııalyq azamattardy kúshtep qaıtarý máselesi boıynsha yntymaqtastyqty keńeıtýdi kelisti.

Qazirgi ýaqytta elde 128 sırııalyq azamat bar. Olarǵa deportatsııa úkimi shyqqan, biraq olardy Sırııaǵa qaıtara almaıtyndyqtan, áli de elde erkin júr. Iohan Forsseldiń aıtýynsha, olardyń arasynda aýyr qylmys jasaǵan jáne memlekettik qaýipsizdikke qaýip tóndiretinder de bar.

— Bul adamdar Shvetsııada qylmys jasap, sol arqyly osy eldiń bóligi bolýdan bas tartyp otyr. Sondyqtan olardy deportatsııalaý kerek, — dedi ol.

Stokgolm jańa sırııalyq bılik óz azamattaryn qabyldap, olardyń kim ekenin anyqtaýǵa kómektesedi dep úmittenedi. Mınıstrler Sırııa sottalǵan azamattardy keri qabyldamasa, Shvetsııadan úlken qarjylyq kómekke dámelenbeýi kerek ekenin atap ótti.

Buǵan deıin Shvetsııa 13 jastan bastap qylmystyq jaýapkershilikti engizýdi josparlap otyrǵanyn jazdyq.

Sondaı-aq Shvetsııa áıelderge qaýip tóndiretin erlerdi júıeli túrde anyqtaýǵa kiristi.