Shvetsııa adam ómiriniń uzaqtyǵy boıynsha kóshbasshylyq ornyn joǵaltyp jatyr
ASTANA. KAZINFORM — 1970-jyldardyń basynda Shvetsııa adam ómiriniń ortasha uzaqtyǵy boıynsha álemde birinshi orynda turǵan bolatyn, dep habarlaıdy AZERTADJ.
Búginde bul el 10-orynǵa túsip qalǵan. Qazir Shvetsııa bul kórsetkish boıynsha Italııa, Ispanııa jáne Japonııadan qalyp qoıyp otyr.
Karolın ınstıtýtynyń dotsenti Karın Modıgtiń aıtýynsha, Shvetsııa náreste ólim-jitimin tómendetýge erte qol jetkizip, uzaq ýaqyt boıy bul artyqshylyqty saqtap kelgen. Qazirgi kezde balalar arasyndaǵy ólim-jitim deńgeıi álemdegi eń tómen kórsetkishterdiń biri bolyp sanalady (0,2 paıyz), sondyqtan Shvetsııanyń ómir súrý uzaqtyǵy boıynsha artta qalýynyń basty sebebi — egde jastaǵy adamdar arasyndaǵy ólim deńgeıiniń joǵary bolýy.
Ásirese, Shvetsııada 85 jastan asqan adamdar arasynda ólim qaýpi basqa kóptegen elderge qaraǵanda joǵary ekeni baıqalyp otyr. Aldyn ala zertteýler kórsetkendeı, erekshe kútimdi qajet etetin egde jastaǵy adamdar Shvetsııaǵa qaraǵanda Japonııa men Ońtústik Eýropada uzaq ómir súretin kórinedi.
— Biz Japonııa men Shvetsııada qarııalarǵa kútim jasaý men ómirdi qoldaıtyn sharalarǵa qatysty mádenı aıyrmashylyqtardyń bar ekenin bilemiz. Mysaly, Shvetsııada qart adam tamaq ishýden bas tartsa, biz ádette oǵan zond qoımaımyz, onyń sheshimine qurmetpen qaraımyz, — deıdi K. Modıg.
Mamandardyń pikirinshe, Shvetsııanyń qazirgi jaǵdaıyna áser etken negizgi faktorlar mynalar: shved áıelderi arasynda temeki shegýdiń erte taralýy, jumys pen otbasy arasyndaǵy aýyr júktemeni qatar alyp júrý, sondaı-aq tamaqtaný ádetterindegi erekshelikter.
Sarapshylar Shvetsııa ómir súrý uzaqtyǵy eń joǵary elder qataryna qaıta qosylǵysy kelse, egde jastaǵy adamdardyń densaýlyǵy men kútimine erekshe nazar aýdarý qajet degen ortaq pikirde. Sebebi jastar arasyndaǵy ólim-jitim deńgeıi óte tómen bolǵandyqtan, bul baǵytta jaqsartýǵa bolatyn asa mańyzdy másele qalmaǵan.
Budan buryn Shvetsııa men Somalı deportatsııa máselesi boıynsha qupııa kelisim jasaǵany anyqtaldy.
