Shvedter «stan» jurnaǵy bar elderdi áli kúnge deıin aıyra almaıdy - elshi Eleýkenov
ASTANA. QazAqparat - Qazaqstannyń Shvetsııadaǵy Tótenshe jáne Ókiletti elshisi Dastan Eleýkenovtyń aıtýynsha, shvedterdiń basym bóligi Ortalyq Azııany durys bilmeıdi, dep xabarlaıdy QazAqparat tilshisi.
"Negizi Qazaqstandy biletin shvedterdiń bizge degen kózqarasy jaqsy. Sosyn árbir salanyń adamdary árqalaı qabyldaıdy. Mysaly, bizdiń qatarlastarymyz Olımpıada chempıony Vladımır Smıronovty jaqsy biledi. Ol arqyly Qazaqstandy tanıdy. Al xokkeımen aınalysatyndar xokkeı ónerimizdiń jaqsy damyǵanynan habardar. Jalpy, shvedter úshin Ortalyq Azııa ol - "terra ınkognıto", ıaǵnı belgisiz álem ispetti. Olar "stan" degen jurnaǵy bar memleketterdi durys aıyra almaıdy. Sol sebepti bárin túsindirýge tyrysamyz. Baspasóz betterinde arnaıy materıaldardy jarııalaımyz", - dedi D. Eleýkenov búgin Astanada ótken baspasóz máslıxatynda.
Elshiniń aıtýynsha, Ortalyq Azııa elderi ishinen tek Qazaqstan ǵana Shvetsııada óz elshiligin ashqan. Úsh jyl buryn paıdalanýǵa berilgen dıplomatııalyq mıssııanyń ǵımaraty jańadan salynǵan bolatyn.
Aıta keteıik, búgin Qazaqstannyń Fınlıandııadaǵy Tótenshe jáne Ókiletti elshisi Murat Nurtileýov te baspasóz máslıxatyn ótkizdi. Onyń aıtýynsha, Fınlıandııa prezıdenti Qazaqstanǵa úlken delegatsııamen kelmekshi .
