Shvedter bıyl merkelik syılyqqa kóbirek aqsha jumsamaq

ASTANA. KAZINFORM — Shvetsııada bıyl Rojdestvo merekesine arnalǵan syılyqtarǵa halyq ótken jylǵa qaraǵanda edáýir kóp qarjy jumsamaq, dep habarlaıdy AZERTADJ.

Saýalnamaǵa sáıkes, turǵyndar orta eseppen 3348 kron (351 dollar) jumsaýdy josparlap otyr, bul ótken jylmen salystyrǵanda 300 kronǵa artyq. Shyǵynnyń ósýi baǵanyń qymbattaýymen, keıbir turǵyndardyń qarjylyq jaǵdaıynyń jaqsarýymen jáne ekonomıkaǵa qatysty alańdaýshylyqtyń tómendeýimen baılanysty.

Alaıda, qarjylyq qıyndyq qaýpi de artyp keledi. Ár besinshi adam óz múmkindiginen artyq jumsaıtynyn moıyndasa, shamamen úshten biri josparlaǵanynan kóbirek shyǵyndaıtynyn aıtqan. Ekonomıster merekege arnalǵan qymbat nesıe alý qaryzǵa batýǵa ákelýi múmkin ekenin eskertedi.

Zertteý kórsetkendeı, ártúrli tabys deńgeıindegi adamdardyń shyǵyny aıtarlyqtaı erekshelenedi. Aıyna 20 myń kronǵa deıin tabys tabatyndar shamamen 2 myń kron (210 dollar), al 40 myń kronnan joǵary tabys tabatyndar 5 myń kronnan (530 dollardan) astam jumsaıdy dep josparlaǵan.

Eń tanymal syılyqtar — kıim jáne sándi zattar (shamamen 40%), odan keıin oıynshyqtar, ınterer zattary jáne turmystyq taýarlar. Saýalnamaǵa qatysqandardyń shamamen 5%-y syılyq satyp alýdy josparlamaıdy.

Ekonomıster bıýdjetine senimsiz adamdarǵa aldyn ala shyǵyndy josparlaýǵa, lımıt belgileýge, otbasymen jaǵdaıdy talqylaýǵa jáne nesıeni tekserýge keńes aıtady. Bul merekeden keıingi qarjylyq qıyndyqtardy boldyrmaýǵa kómektesedi.