Shved soty Statıge qarsy iste Qazaqstan tarapynyń paıdasyna sheshim shyǵardy
ALMATY. QazAqparat - Svealandtyń apellıatsııalyq soty Anatol jáne Gabrıel Statıge qarsy is boıynsha Qazaqstan tarapy – Qazaqstan Ulttyq Bankiniń jáne Ádilet mınıstrligi atynan Qazaqstan Respýblıkasynyń paıdasyna sheshim qabyldady , dep habarlaıdy QazAqparat QR Ulttyq Bankiniń baspasóz qyzmetine silteme jasap.
Shved sottarynda isti qaraý 2018 jyldan bastap jalǵasty. Sotqa edáýir dáleldemeler men dálelder, onyń ishinde Ulttyq Bank tóraǵasynyń orynbasary Álııa Moldabekovanyń kýágerlik aıǵaqtary, sondaı-aq Anglııa, Shved jáne Qazaqstan quqyǵy boıynsha sarapshylardyń qorytyndylary usynyldy. Protseske qatysý úshin «Frank Advokatbyra» áıgili zań fırmasy tartyldy. Protsess barysynda Qazaqstan Ulttyq Banki Statı dálelderiniń negizsizdigin dáleldedi jáne aktıvter BUU 2004 jylǵy 2 jeltoqsandaǵy Konventsııasynda bekitilgen halyqaralyq quqyq qaǵıdattaryna sáıkes absolıýtti ımmýnıtetpen qorǵalǵanyn rastady. Budan basqa, Shved soty Statıdi Ulttyq Bankke jáne Qazaqstan Respýblıkasyna tolyq kólemde sot shyǵystaryn óteýge mindettedi. Mundaı sheshimder Skandınavııa memleketiniń sot praktıkasynda óte sırek shyǵarylatyn bolyp esepteledi. Shved sotynyń sheshimi Ulttyq qordyń aktıvterinen 83 mln dollarǵa jýyq somada tyıymdy alyp tastaýǵa múmkindik beredi jáne Statıdiń Qazaqstan Respýblıkasyna qarsy alqalyq sheshimdi oryndatýǵa ákelý múmkindikterimen baılanysty uzaqqa sozylǵan sotta isti qaraý júıesindegi mańyzdy bólim bolyp tabylady.
Budan buryn Anglııa soty Statı tarapynan alqalyq sheshimdi alý kezinde alaıaqtyq belgilerin anyqtady. Buǵan qaramastan, Statı 2017 jyly Ulttyq qordyń aktıvterine tyıym salýǵa qol jetkizgen. 2020 jylǵy 22 sáýirde Anglııanyń Joǵary soty Statıdiń dálelderin joqqa shyǵaryp jáne Ulttyq Banktiń BNYM kastodıanynda Ulttyq Bank aldynda ǵana Ulttyq qor aktıvterine qatysty mindettemeleri bar ekendigi týraly dálelderimen kelisip, Qazaqstan tarapynyń paıdasyna da sheshim shyǵarǵanyn eske salamyz. Ulttyq Bank sheteldik ıýrısdıktsııalarda óz quqyqtary men múddelerin qorǵaýdy jalǵastyrýda jáne Statıden keltirilgen zııandy ótetýge qol jetkizýge nıetti.