Shved polıtsııasy áıelderge qatysty zorlyq-zombylyqpen kúrestegi óz kemshilikterin moıyndady

ASTANA. KAZINFORM — Shved polıtsııasynyń basshylyǵy áıelderdi jaqyn qarym-qatynastaǵy er adamdar tarapynan jasalatyn kisi óltirý qylmystarynan qorǵaý jumystarynyń tıimdi bolmaýyna ishki kózqarastar men empatııa jetispeýshiligi kedergi keltirgenin moıyndady, dep jazdy AZƏRTAC.

AZƏRTAC agenttiginiń habarlaýynsha, bul týraly turmystyq zorlyq-zombylyqtyń aýyr jáne ólimmen aıaqtalatyn túrleriniń aldyn alýǵa baǵyttalǵan ulttyq polıtseılik «Beta» operatsııasy aıasynda daıyndalǵan esepte aıtylǵan.

Qujatta 2023–2024 jyldary áıelderdi olardyń seriktesteri nemese basqa da jaqyn er adamdar óltirgen 17 is qarastyrylǵan. Osy isterdiń úsheýinde polıtsııada zorlyq-zombylyq týraly aqparat bola tura, tipti resmı aryz tirkelmegen. Esepte birneshe oqıǵada eger polıtsııa tıisti áreket jasaǵan bolsa, áıelder aman qalýy múmkin edi dep atap kórsetiledi.

«Beta» operatsııasynyń ulttyq operatsııalyq jetekshisi ıAle Polıarevıýs baspasóz konferentsııasynda bul máseleniń túp-tamyry búkil qoǵam mádenıetinde jatqanyn aıtyp ótti. Onyń sózinshe, polıtsııa áıel adamnyń aryzdanýdan bas tartýyn ǵana negiz etip toqtap qalmaýy kerek. Qyzmetkerlerdiń boıynda empatııany damytý — jumystyń basty bóligine aınalýy tıis.

Jańa is-qımyl jospary aıasynda polıtsııa qyzmetkerleri úshin standarttalǵan áreket algorıtmderin engizý jáne qaýip-qater men osaldyq faktorlaryna nazardy kúsheıtý kózdelip otyr. Bul alǵashqy tergeý suhbattarynyń sapasyn arttyryp, jábirlenýshi basynda ary qaraı is júrgizýden bas tartsa da, tergeýdi júıeli túrde jalǵastyrýǵa múmkindik beredi.

Polıtsııa ókilderiniń aıtýynsha, jańa strategııanyń basty maqsaty — júıeli kemshilikterdi anyqtap, olardy tez arada joıý.

Eske sala keteıik, buǵan deıin Shved arheologteri XII ǵasyrǵa tıesili kúmis monetalardy tapqan edi.