Shved oqýshysy Nobel syılyǵyna usynyldy
ASTANA. QazAqparat - Shvedtik mektep oqýshysy Greta Tornberg ǵalamdyq jylýmen kúres qozǵalysyna qosqan úlesi úshin Beıbitshilik salasyndaǵy Nobel syılyǵyna usynyldy, dep habarlaıdy QazAqparat.
Mundaı usynysty birqatar shvedtik jáne norvegııalyq saıasatkerler jasady.
«Mundaı mańyzdy syılyqqa usynylǵanymnyń ózi men úshin úlken qurmet. Bul keremet jáne azdap qyzyq ta», -dedi 16 jastaǵy oqýshy qyz Aftonbladet basylymyna bergen suhbatynda.
Ótken jyldyń tamyz aıynda Greta Stokgolmdegi parlament ǵımaratynyń aldyna jalǵyz ózi ereýilge shyqqan bolatyn. Ol Shvetsııa zııandy qaldyqtardy azaıtý jónindegi Parıj kelisimi sharttaryn oryndamaıynsha mektepke barmaıtyndyǵyn málimdegen. Artynsha ol klımat máseleleri boıynsha BUU konferentsııasy men Davosta ótken forýmǵa shaqyrtý aldy.
