Shved baspasózinde Trampqa degen qyzyǵýshylyq óz saıasatkerlerinen joǵary

ASTANA. KAZINFORM — AQSh-tyń prezıdenti Donald Tramp Shvetsııa medıakeńistiginde eń jıi aıtylatyn tulǵalardyń biri bolyp otyr. Onyń alǵashqy prezıdenttik merzimi kezinde de birneshe jyl boıy aqparat quraldarynyń basty nazarynda bolǵan, al qazir — ol bul orynǵa qaıta oraldy, dep jazdy AZƏRTAC.

Retriever zertteý kompanııasy TT aqparat agenttiginiń tapsyrysy boıynsha júrgizgen zertteýge sáıkes, 2025 jyldyń qańtarynan shildesine deıin Tramptyń aty 125 000 ret atalǵan. Bul kórsetkish Shvetsııadaǵy barlyq partııa jetekshileriniń esimderi atalǵan sandardan eki ese kóp.

Mysaly, Shvetsııa premer-mınıstri Ýlf Krıstersson týraly osy ýaqyt aralyǵynda shamamen 25 000 jarııalanym shyqqan. Al barlyq shved partııa jetekshileri jaıly jalpy 51 000 materıal jarııalanǵan.

Geteborg ýnıversıtetiniń medıa sarapshysy Marııa Grýssel bul jaǵdaıdy Tramptyń álemdik saıasattaǵy yqpalymen jáne erekshe, aıqyn sóıleý mánerimen baılanystyrady. Onyń áleýmettik jelidegi belsendiligi men ótkir málimdemeleri ony únemi jańalyqtarda ustap turýǵa múmkindik beredi.

— Ol óte polıarızatsııalanǵan tulǵa — Trampqa qatysty pikirler nemese qara, nemese aq. Ol oıyn ashyq aıtady, jáne múlde «sabyrly» shved saıasatkerine uqsamaıdy. Shvetsııa saıasatkerleri AQSh saıasatkerlerimen salystyrǵanda nazardan tys qalyp jatady. Tipti keıbir shved saıasatkerleri Tramptyń sóıleý stılin qaıtalaýǵa tyrysady, — deıdi Grýssel.

Sarapshynyń aıtýynsha, mundaı «aqparattyq ústemdik» shved saıasatkerleriniń qoǵam nazaryn aýdarýyn qıyndata túsedi. Ol Tramptyń áreketterin tereńirek saraptap, tek sózderin qaıtalaýmen shektelmeı, buqaralyq aqparat quraldaryna jaýapkershilikpen qaraýǵa shaqyrady.

Eske sala keteıik, buǵan deıin Tramp fýtboldan álem chempıonatynyń jerebe tartý rásimi qashan jáne qaıda ótetinin aıtty.