Shvetsııadaǵy Lınchepıng qalasynda qýatty jarylys boldy
NUR-SULTAN. QazAqparat - Qýatty jarylys el astanasy Stokgolmnen 174 shaqyrym ońtústiktegi Lınchepıng qalasynyń qaq ortasynda bolǵan, dep habarlaıdy TT agenttigi.
Jarylys saldarynan bir adam aýrýhanaǵa jetkizildi.
«Biz Hamngatan kóshesinde qatty jarylys bolǵany týraly habar aldyq. Oqıǵa ornyna barǵan kezde áldeneniń jarylǵanyn kórdik», - deıdi polıtsııa baspasóz qyzmetiniń qyzmetkeri Osa Vıllsýnd.
Jarylys birneshe kompanııalar ornalasqan ǵımarattar men turǵyn úılerge jaqyn mańda bolǵan. Olardyń da terezeleri synǵan, balkondary qıraǵan.
«Qazir oqıǵa ornyn qaýipsiz etip, japa shekkenderdiń bar-joǵyn anyqtap jatyrmyz», - deıdi Vıllsýnd.
Oqıǵa ornyna 14 jedel járdem mashınasy jiberilgen.
Jarylys sebepteri ázirge belgisiz.
