Shvetsııada Stokgolmdegi terakt boıynsha sot isi bastaldy
BRıÝSSELЬ. QazAqparat - Stokgolmde byltyr sáýirde Shvetsııa astanasynda terakt jasady degen kúdikke ilingen Rahmat Akılovqa qatysty sot isi bastaldy, dep habarlaıdy «QazAqparat» HAA menshikti tilshisi jergilikti BAQ-qa silteme jasap.
39 jastaǵy Ózbekstan týmasy Rahmat Akılov seısenbi kúni Stokgolm aımaqtyq sotynda jaýap berdi. Oǵan terrorızmmen baılanysty birqatar aıyp taǵyldy.
Aıyptaýshy tarap ony ómir boıyna bas bostandyǵynan aıyryp, Shvetsııadan ekstradıtsııalaýdy suraýda. Tyńdalymnyń sońǵy kúni 9 mamyrǵa belgilengen.
Rahmat Akılov Shvetsııany Irak pen Sırııadaǵy DAISh terrorıstik uıymyna qarsy halyqaralyq koalıtsııaǵa qatysqany úshin jazalaǵysy kelgendigin málimdegen.
Onyń advokatynyń sózine qaraǵanda, R. Akılov 10 aı boıy júrgizilgen tergeý kezinde tergeýshilermen birge qyzmet istegen.
Eske salaıyq, 2017 jyldyń sáýirinde Akılov júrgizip kele jatqan júk kóligi Stokgolmnyń ortalyq kósheleriniń birinde adamdardy basyp ketken. Bes adam qaza taýyp, 10-y jaraqat alǵan. Bılik bolǵan oqıǵany terakti dep tanydy.
