Shvetsııada parlament ǵımaratynyń janynda Quran órteldi

STOKGOLЬM. QazAqparat – Shvetsııada parlament ǵımaratyna jaqyn jerde Quran kitaby órteldi. Ony uıymdastyrǵan – Irak mıgranttary Salvan Momıka men Salvan Nadjem. Alaýyzdyq týdyrýǵa qatysty osyǵan uqsas manıfestatsııa ótkizgeni úshin olardyń ústinen qylmystyq is buǵan deıin qozǵalǵan bolatyn – ekeýi Quran paraqtaryn jaqqan edi. QazAqparat bul týraly Anadolyǵa silteme jasap habarlaıdy.

Parlament aldyndaǵy alańǵa 50-ge jýyq adam jınaldy. Olardyń deni jýrnalıster boldy. Momıka men Nadjem qasıetti kitapti teýip, keıin orta tusyndaǵy betterin órtedi.

VVS málimetinshe, Danııa men Shvetsııa úkimetteri sóz jáne pikir erkindigi prıntsıpterin buzbaı, Quran men ózge de dinı mátinderdi kópshilik aldynda jaǵý aktsııalaryna qalaısha tyıym salýǵa bolatynyn oılastyryp jatyr. Keıingi ýaqytta osyndaı aktsııalar atalǵan elderge aıtarlyqtaı problema týyndatqan edi.

Eske salaıyq, bıylǵy maýsym aıynyń sońynda Shvetsııa astanasynda Quran kitaby kezekti ret órtelgen bolatyn.

Qazaqstan Prezıdenti Qasym-Jomart Toqaev birqatar elde Qurandy órteý aktilerine qatysty pikir bildirip, mundaı oqıǵalar jalpyǵa ortaq normalarǵa qaıshy keletin aktsııalar retinde biraýyzdan aıyptalýǵa tıistigin atap ótti.

BUU Bas Assambleıasy qasıetti kitaptardy qorlaýǵa qatysty kez kelgen aktilerdi aıyptaıtyn jáne mundaı áreketterdi halyqaralyq quqyq normalaryn buzý dep tanıtyn qaýly qabyldady.

Keıin Eýropa odaǵynyń Syrtqy ister jáne qaýipsizdik saıasaty jónindegi joǵarǵy ókili Jozep Borrel sársenbi kúni musylmandardyń qasıetti kitaby Qurannyń órtelýine qatysty málimdeme jasady.