Shvetsııada koronavırýs juqtyrýdyń alǵashqy jaǵdaıy tirkeldi
Naýqas áıel vırýs órshigen Qytaıdyń Ýhan qalasynda saparmen bolǵan. Ol úıine 24 qańtar kúni oralǵan. Jótel mazalaǵan. Shvetsııa memlekettik densaýlyq saqtaý basqarmasynyń aqparatynsha, onyń syrqaty aýyr emes.
«Shvedter kóp saıahattaıtynyn eskersek, bul, biz úshin kútpegen jaǵdaı emes. Biz jaǵdaıdy baqylap otyrdyq jáne mundaıdyń bolaryn boljadyq. Osyndaı jaǵdaılar birqatar ózge de memlekette anyqtaldy», - dep túsinik berdi departament basshysy Karın Tegmark Vızell.
Onyń aıtýynsha, «basqa elderdiń tájirıbesine súıene otyryp, qazirgi ýaqytta ınfektsııanyń taralý qaýpi óte tómen». Shvetsııa jańa koronavırýs anyqtalǵan Soltústik Eýropadaǵy ekinshi memleket. Birinshi jaǵdaı Fınlıandııada tirkelgen bolatyn. Fındik qoǵam densaýlyǵyn saqtaý ınstıtýty sársenbi kúni Rovanıemıdegi qytaılyq týrıste vırýs anyqtalǵanyn resmı rastady.