Shvetsııada fızıologııa jáne medıtsına salasyndaǵy Nobel syılyǵynyń ıegerleri jarııalanady
ASTANA. QazAqparat - Kezekti Nobel aptalyǵy 3 qazanda Shvetsııanyń astanasynda fızıologııa jáne medıtsına salasyndaǵy Nobel syılyǵynyń laýreattarynyń esimin jarııalaýdan bastalady. Jaqyn arada ózge atalymdardaǵy syılyq ıegerleri belgili bolady. Osylaısha, 4 qazanda fızıka salasy boıynsha, 5 qazanda hımııa salasy boıynsha Nobel komıtetiniń sheshimi belgili bolmaq. 7 qazanda Osloda beıbitshilik syılyǵynyń laýreaty jarııalanady, dep habarlady TASS.
1968 jyly Shvetsııa memlekettik banki bekitken ekonomıka boıynsha Nobel syılyǵynyń ıegeri 10 qazanda belgili bolady. Shvetsııalyq akademııa ádebıet salasyndaǵy marapat kimge buıyratynyn 13 qazanda habarlaıdy.
Óziniń ósıetinde Alfred Nobel fızıologııa jáne medıtsına salasyndaǵy Nobel syılyǵynyń laýreatyn tańdaýdy Stokgolmdegi Karolına ınstıtýtyna tapsyrǵan. Kózi tiri kezinde qurylǵan Nobel komıteti bes turaqty músheden turady. Olar keńes alý úshin sarapshylardy shaqyrýǵa quqyly.
Foto:© AP Photo/Patrick Semansky
