Shvetsııada Eýropa qazaqtarynyń kishi Quryltaıy ótti

Bul týraly Dúnıejúzi qazaqtary qaýymdastyǵynyń uıymdastyrý bóliminiń meńgerýshisi Botagóz Ýatqan málim etti.

Quryltaıǵa Qazaqstannan, Eýropanyń onshaqty elinen, Túrkııadan 700-ge jýyq qazaq dıasporasynyń ókilderi jáne Dúnıejúzi qazaqtary qaýymdastyǵy atynan Qaýymdastyqtyń Tóralqa múshesi, Tóraǵanyń orynbasary Sultanáli Balǵabaev, Qazaqstannyń eńbek sińirgen ártisi Baǵdat Sámedınova, mádenıet qaıratkerleri Merýesh Bashaı men Ómirqul Aınııazov qatysyp qaıtty.

Quryltaıǵa qatysýshylardy quttyqtaý úshin Londonnan arnaıy ushyp kelgen Qazaqstannyń Ulybrıtanııadaǵy Tótenshe jáne Ókiletti elshisi Qaırat Ábýseıitov pen Shvetsııada turatyn Túrkııanyń elshisi Sheńgiz Pyraq jáne Vesteros qalasynyń meri arnaıy qatysyp, sóz sóılegen.

«Dúnıejúzi qazaqtarynyń ІV Quryltaıy áserinen áli de aryla qoımaǵan qazaq jastarynyń kóńil-kúıleri óte kóterińki. Bolashaqta elge kelip oqyǵysy keletinderdiń sany arta túsipti. Úlken Quryltaıǵa kelip ketken soń úılerinde tek qazaq tilinde sóılesý kerek dep talap qoıýdy shyǵarypty jastarymyz. Bul da Quryltaıdyń jemisi bolar. Astana áýejaıyna alǵash ret kóp qazaqtardy kórgen bir qandasymyz kózine jas alyp «osynshama qazaqty buryn kórmeppin» dep jylaǵanyn da jasyrǵan joq. Alpysynshy jyldardyń ortasynda jumys izdep Túrkııadan barǵan aǵaıyndardyń arasyndaǵy kóne kóz qarııamyz Abdýlla Shaǵataı aǵamyz ben jeńgemiz Saıypjamaldyń qolynan dám tattyq. Qazaq salt -dástúrin buljytpaı ustanyp kele jatqan erli-zaıyptylardyń aıtarlary kóp. Olar jas jetkinshekteriniń bolashaqta óz ana tilderinen aıyrylyp qalý qaýpinen qorqatyndaryn jetkizdi. Jyl saıyn ótkizilip kele jatqan Eýropa qazaqtarynyń kishi Quryltaıynda Eýropanyń onshaqty elinde turatyn qazaq jastarynyń bir birimen tabysyp, úılenip jatqandaryna qýanady»,-deıdi kishi Quryltaıǵa qatysyp qaıtqan Botagóz Ýatqan.

Shara barysynda dóńgelek ústel otyrystary, sonymen qatar sporttyq sharalar uıymdastyrylǵan. Dóńgelek ústelde ana tiliniń ózekti máseleleri talqylanǵan.

Quryltaı baǵdarlamasy aıasynda fýtbolǵa qatysqan 8 komandadan: Frantsııa - 1 oryn, Túrkııa - 2 oryn, Shvetsııa - 3 orynǵa ıe boldy.

Kishi Quryltaıda bas qosqan álemniń 14 elinen kelgen qandastarymyzdyń aldynda Eýropa qazaq mádenı ortalyqtary federatsııasynyń tóraǵasy Abdýlqaıým Kesıjı 2020 jylǵa deıingi is-sharalar jospary bekitilgenin, sondaı-aq kelesi jylǵy kishi Quryltaı Danııada ótetinin jarııa etti. Onyń aıtýynsha, kishi Quryltaı ústimizdegi jyldyń jeltoqsan aıynda Parıj qalasynda ótetin jastardyń dóńgelek ústeline ulaspaq.