Shvetsııa shekarada tólqujatty baqylaýdy engizdi
ASTANA. QazAqparat - Shvetsııa elge keletin bosqyndardyń sanyn shekteý maqsatynda shekarada tólqujatty baqylaýdy engizdi. Bul týraly Al Jazeera habarlady.
Elge Danııadan avtobýs, poıyz nemese parommen keletinderdiń qujattaryn tekseredi. Tıisti qujattary bolmaǵandar qaıtarylady.
Bosqyndardy qabyldaǵan Shvetsııa olardyń kelýi rekordtyq kólemnen asqanyn jáne olar ony baqylaı almaıtynyn habarlady. Bıliktiń aıtýynsha, olar bosqyndardyń barlyǵyna baspana berýge qaýqarsyz. Endi balalary bar januıalarǵa basymdyq beriledi.
9,5 mıllıon turǵyny bar elge ótken jyly 160 myń bosqyn keldi. Olar - negizinen Sırııa, Irak jáne Aýǵanstannan kelgender.
Ótken jyly Shvetsııaǵa barǵandardyń shamamen 80 paıyzynda tólqujat nemese ony aýystyratyn jeke kýálik bolmady.
Sonymen qatar, shekaradaǵy baqylaý sheshimin quqyq qorǵaýshylar synǵa aldy. Olardyń pikirinshe, bul bosqyndardyń pana tabýyn shekteıdi.
Ótken jyldyń qarashasynda Shvetsııa osyǵan uqsas shara engizgen.
2015 jyldyń basynan Eýropaǵa barlyǵy 800 myńnan astam bosqyn keldi. Negizinen Sırııa, Irak, Lıvııa, Aýǵanstannan kelgender. Birqatar eýropalyq el bosqyndardy qabyldaý lımıti taýsylǵanyn aıtty. Keıbireýleri sońǵy aılarda shekaradaǵy baqylaýǵa qosymsha sharalar engizdi, dep habarlady Lenta.rý.
Foto: Michal Fludra / Zuma / Global Look
