Shvetsııa Qazaqstan ekonomıkasyna qarjy quıatyn ınvestorlaryn yntalandyrýda
ASTANA. QazAqparat - Shvetsııa Úkimeti Qazaqstan ekonomıkasyna qarjy quıatyn ınvestorlaryn yntalandyrýda. Bul týraly búgin Aqordada Qazaqstan Prezıdenti Nursultan Nazarbaevqa senim gramotasyn tapsyrǵannan keıin Shvetsııa Elshisi Mats Foıer aıtty, dep habarlaıdy QazAqparat.
«Saýda-ekonomıkalyq jáne ınvestıtsııalyq ózara is-qımyl qarqyndy damyp keledi. Shvetsııa Qazaqstan ekonomıkasyna tikeleı ınvestıtsııa salý jáne taýar aınalymy boıynsha soltústik elder arasynda ekinshi orynda. Bul shved bıznesmenderiniń Qazaqstanǵa qyzyǵýshylyǵynyń artýynyń jáne Shvetsııa Úkimeti tarapynan olardy yntalandyrýdyń dáleli bola alady. Máselen, 2015 jyly Shvetsııa eksportty ilgeriletý jónindegi strategııa qabyldady. Onda shved ónimderiniń eksporty yntalandyrylatyn basymdyqqa ıe elderdiń arasynda Qazaqstan da bar. Osy aıda kólik ınfraqurylymy men energetıka salasyndaǵy shvedtiń saýda delegatsııasy Qazaqstanǵa keledi. Ǵylym men ınnovatsııa salasyndaǵy yntymaqtastyqqa basa nazar aýdarylady», - dedi Shvetsııa Elshisi.
Sonymen qatar ol osydan bir jyl buryn Qazaqstan men Shvetsııa BUU Qaýipsizdik keńesiniń 2017-2018 jyldardaǵy turaqty emes múshesi retinde qyzmetine kiriskenin jáne eki el kún tártibinde barlyq máselelerde tyǵyz yntymaqtastyqta ekenin aıtty.
«Qazaqstandy BUU Qaýipsizdiń keńesiniń tóraǵasy retindegi mańyzdy rólimen quttyqtap tabys tileımin. Qazaqstan syrtqy saıasatynyń ózektiligin eskere otyryp, Shvetsııa halyqaralyq saıasattaǵy ózekti máseleler boıynsha dıalogty damytqysy keledi. Shırek ǵasyrda qol jetkizilgen shved-qazaqstandyq yntymaqtastyqtyń joǵary deńgeıi saıası dıalogty odan ary nyǵaıta túsý úshin jańa keleshekter ashady», - dedi Mats Foıer.
Buǵan deıin habarlaǵanymyzdaı, Aqordada Qazaqstan Prezıdenti Nursultan Nazarbaev birqatar shetel Elshisinen senim gramotasyn qabyldaǵan bolatyn.
