Shvetsııa qarttar úshin eń jaıly el bolyp tanyldy
ASTANA. 2 qazan. QazAqparat - HelpAge International úkimettik emes uıymy 1 qazan, Halyqaralyq qarttar kúni qartaıý boıynsha álemniń 91 elindegi zeınetkerlerdiń turmys jaǵdaıyna arnalǵan Global AgeWatch Index 2013 birinshi ǵalamdyq kórsetkishin jarııalady. Olardyń zertteýlerine sáıkes qarttar úshin eń jaıly el Shvetsııa bolyp tanyldy. Qart adamdardy qamqorlyǵyna alǵan úshtiktiń qataryna, sondaı-aq Norvegııa men Germanııa endi, dep habarlaıdy RBK.
Zertteý avtorlary ár túrli elderdegi qart adamdardyń jaǵdaıyna baǵa berýde tórt basty ólshemdi alǵan, olar: materıaldyq jaǵdaıy, densaýlyǵy, jumystylyǵy men bilimi jáne jalpy ómir súrý deńgeıi.
Eń tıimdi el Shvetsııa osy kórsetkishter boıynsha 89,9% alsa, eń sońǵy oryndaǵy Aýǵanstannyń kórsetkishi bar bolǵany - 3,3%.
HelpAge International paıymdaýynsha, kórsetkishterdi muqııat taldaý bıliktegilerge qart adamdardyń ómirindegi osal tustardy anyqtaýǵa múmkindik beredi. Sonymen birge zeınetaqynyń ósýi qarttardyń turmysyna tikeleı áser etpeıtindigin atap ótedi. Mysaly, Lıýksembýrgte eń joǵary tabysy bar adamdar turady, biraq ol bar bolǵany 16-orynda tur.
Ǵalamdyq reıtıng qart adamdardyń negizinen Soltústik jáne Batys Eýropada, Soltústik Amerıka jáne Shyǵys Azııa men Latyn Amerıkasynyń keıbir elderinde turatyndyǵyn kórsetip berdi. Qarttar ómiriniń jaılylyǵy boıynsha úzdik ondyqqa Nıderlandy, Kanada, Shveıtsarııa, Jańa Zelandııa, AQSh, Islandııa jáne Japonııa kiredi. Burynǵy KSRO elderinen aldyńǵy orynda Estonııa (19) tur.
Zerteýshiler sonymen birge XXI ǵasyrdyń ortasynda adamzatty taǵy bir problema kútip turǵanyna nazar aýdarady: Jerdegi 60-tan asqan adamdardyń sany eki esege ósip, 22 % quraıdy. Qarttar sany búgingi 809 mln. adamnan 2 mlrd. 31 mln-ǵa jetedi.
