Shvartsenegger Tramptyń synyna jaýap retinde vıdeoúndeý jazdy
ASTANA. QazAqparat - Arnold Shvartsenegger ózi júrgizetin «Juldyzdyń shákirti» atty shoý baǵdarlamanyń tómen reıtıngi boıynsha AQSh prezıdenti Donald Tramptyń keshegi keleke pikirine Twitter-degi akkaýntynda jaýap berdi.
Kalıfornııanyń burynǵy gýbernatory óziniń mıkroblogynda vıdeo ornalastyryp, onda Avraam Lınkolnniń 1861 jyldyń 4 naýryzyndaǵy alǵashqy ınaýgýratsııada sóılegen sózin oqyp berdi.
«Biz qas emes, dospyz. Biz dushpan bolmaýymyz tıis. Degenmen, qaıshylyqtar múmkin bar shyǵar, biraq olar dostyǵymyzǵa syzat túsirmeýi kerek», - dep oqı bastady akter.
«...Saılaýaldy naýqan aıaqtaldy, saılaý artta qaldy. Biz dushpandar emespiz, biz kórshi, dos, eń bastysy, barlyǵymyz - amerıkalyqtarmyz. Amerıkanyń bedelin saqtap qalý úshin bizge kóp eńbektený kerek. Sondyqtan, birlesip jumys isteıik», - dedi ol.
Sóziniń sońynda Shvartsenegger jańadan saılanǵan prezıdentke sáttilik tilep, Amerıkanyń barlyq azamatynyń ıgiligine óziniń reıtıngteri úshin eńbektenetindeı kúsh jumsaıtynyna úmit bildirdi.
Donald Tramp bir kezderi «Juldyzdyń shákirti» qaıyrymdylyq shoýyn ózi de júrgizgen edi. Biraq NBC arnasy onyń daý-damaıǵa toly bolǵan saılaýaldy málimdemelerinen keıin mıllıonerden baǵdarlamadan ketýdi suraǵan bolatyn.
Foto: © RIA Novostı. Ekaterına Chesnokova
