Shuryq tesik jol: Óskemendegi Ertis kópiriniń qashan jóndeletini belgili boldy

ÓSKEMEN. KAZINFORM - Óskemen qalasyndaǵy Ertis kópiriniń jol jabyny jaǵdaıyna júrgizýshiler birneshe aıdan beri jappaı shaǵymdanyp keledi.

Kólik júrgizýshileriniń aıtýynsha, Ertis kópirindegi qozǵalys kún ótken saıyn qıyndap ári qaýipti bolyp barady. Kópirdegi asfalttyń ábden tozǵany sonshalyq júrgizýshiler kólik tejeýishin qaıta-qaıta basýǵa, jolaq aýystyrýǵa, tipti tyǵyz kólik aǵynynda oı-shuńqyrlardyń arasymen «ıreleńdep» júrýge májbúr.

— Ol jerdiń shuńqyrynyń ishinde shuńqyr bar. Joldy bilmeseń, kóliktiń astyna zaqyp keltirý qas-qaǵymda, — deıdi júrgizýshi Erjan Ábitaev.

Jaǵdaıdy ýaqytsha bolsa da jeńildetý úshin kommýnaldyq qyzmetter sýyq mezgilde de shuńqyrlardy jamaýǵa májbúr bolǵan. Keıbir ýchaskelerde oıyqtar qolda bar materıaldarmen, tipti kirpishpen toltyrylǵan.

Alaıda júrgizýshiler mundaı sharalar qaýipti azdap tómendetkenimen, máseleni túbegeıli sheshpeıtinin aıtady.

Kópir qashan tolyq jóndeletini týraly qala ákimi Almat Aqyshov málim etti.

Onyń aıtýynsha, jol jabynyna kúrdeli jóndeý jumystaryn mamyr aıynyń sońynda, ıaǵnı mektep oqýshylary kanıkýlǵa shyǵyp, kólik aǵyny azaıǵan kezde bastaý josparlanyp otyr.

— Bıyl kópirdi mindetti túrde kúrdeli jóndeýden ótkizý kerek. Keptelisti azaıtý úshin qozǵalysty durys uıymdastyrý qajet. Múmkin, polıtsııanyń qatysýymen reversıvti qozǵalys engizermiz: kúndiz bir baǵytqa kóbirek jolaq qoıyp, keshke kerisinshe degendeı, — dedi qala ákimi.

Jóndeý jumystaryn 1 qyrkúıekke deıin aıaqtaý kózdelip otyr. Al kúrdeli jóndeý bastalǵanǵa deıin jaýapty qyzmetterge jol qozǵalysynyń qaýipsizdigin qamtamasyz etý úshin shuńqyrlardy jamaý jumystaryn jalǵastyrý tapsyryldy.

Eske salsaq, osyǵan deıin Óskemende Ertis kópiri astyndaǵy jańa jol turǵyndar arasynda daý týdyrǵany habarlanǵan.