Shuńqyrǵa túsip ketken aqtóbelik týraly aqparatqa syıaqy taǵaıyndaldy
AQTÓBE. QazAqparat - Aqtóbe qalasynda iz-túzsiz joǵalyp ketken Kenjebaı Aldashevtyń otbasy aqparat bergen adamǵa syıaqy taǵaıyndady, dep habarlaıdy QazAqparat tilshisi.
Aqtóbelikter joǵalyp ketken 54 jastaǵy Kenjebaı Aldashevty bir apta boıy izdep jatyr. Zarechnyı polıtsııa bólimi, 6655 áskerı bólimi men kınologtar da izdeýdi jalǵastyrdy. Bir apta ishinde radıýsy 15 shaqyrym bolatyn jer birneshe ret tekserildi. Biraq izdeý jumystary esh nátıje bermeı otyr. Búgin otbasy Kenjebaı Aldashev týraly kez kelgen aqparatqa syıaqy beretinin málimdedi.
«Joldasym Kenjebaı Aldashevty bir aptadan beri taba almaı otyrmyz. Týma-týystarymyz, kórshi, eriktiler, dostary izdeýge qosyldy. Kúnde keshkilik jospar quryp, tańerteń shyǵyp, izdeımiz. Ol jezdemizge tańǵy 4:30 shamasynda telefon shalyp, «aıaǵym tońdy, taldan qarmap turmyn» dep aıtqan. Sol kúıi telefonynyń qýaty taýsylyp, birde sónip, birde qosyp, saǵat 6:30-ǵa deıin sóılesti. Oqıǵa ornyna barǵanymen dál taba almady. Negizi 9 qarasha kúni sharýashylyqqa baryp, jol boıy úıge nan ala kelemin dep aıtty. Qazir izdeýden esh nátıje bolmaı tur. Tótenshe jaǵdaı qyzmeti, polıtsııa izdedi. Qazir ózim baqsy, balger jaǵalap júrmin. Kez kelgen aqparatqa syıaqy beremiz. Eń bolmasa denesi tabylsa degen oıymyz bar», - dedi jubaıy Ǵalııa Aldasheva.
Aıta keteıik, Kenjebaı Aldashev jeke sharýashylyǵynda júrip, kún saıyn úıine telefon shalyp turǵan. Balalary habarsyz ketken ákesin izdeý úshin sýretin shyǵaryp, qazir qaladaǵy habarlandyrý oryndaryna ilýge kóshti.
