Shuńqyrǵa túsip, jolda qaldyq: BQO-da kólik ıeleri jol sapasyna shaǵymdandy

ORAL. KAZINFORM – Batys Qazaqstan oblysynda Chapaev pen Jańaqala arasyndaǵy joldyń talapqa saı emestigi týraly aıtylyp keledi.

BQO jolaýshylar kóligi jáne avtomobıl joldary basqarmasynyń basshysy Marat Qýanshalıevtiń Kazinform tilshisine málim etkenindeı, bıyl Chapaev-Jańaqala-Saıqyn (0-130 km) avtomobıl jolynyń 0-51 km bóliginde joldy aǵymdaǵy jóndeý aıasynda shuńqyrlardy biteý jumystary oryndalǵan. Sonymen qatar Chapaev-Jańaqala-Saıqyn (0-104 km) avtojolyn ortasha jóndeý barysynda 51-102 shaqyrym aralyǵynda tańdamaly jóndeý jumystary júrgizilgen. 

- Degenmen Qyzyloba men Shaıdolla aýyldarynyń arasynda jańa shuńqyrlar paıda boldy. Osy shuńqyrlardy biteý úshin joldy kútip ustaý jumystarymen aınalysatyn merdiger mekeme «SSS STORY GROUP» JShS-ǵa tapsyrma berildi, - deıdi M.Qýanshalıev. 

Joldyń dál osy tusy jóninde oblys turǵyny Instagram áleýmettik jelisinde jazdy. Onyń aıtýynsha, 13 qazan kúni Oral qalasynan Jańaqala aýdanyna qaraı bara jatqan mezgilde túngi saǵat 03.30 shamasynda Shaıdolla aýylynyń mańynda avtokóligin úlken shuńqyrǵa soǵyp alǵan.

Sodan mashınasynyń dóńgelegi jarylǵan.

- Avtokóligimde 3 jasar qyzym men jubaıym boldy. Osy jaıtty rásimdeý maqsatynda 102 telefonyna habarlasaıyn dep edim, baılanys bolmady. Dóńgelek aýystyryp, sodan tańǵy saǵat 07.45-ke deıin sol jerde turýǵa týra keldi. Jol sapasy óte nashar, tereń shuńqyrdan qasha almaısyń, - deıdi turǵyn.

Taǵy bir mańyzdy másele, joldy qysqy kezeńde kútip ustaý jaıyn esten shyǵarýǵa bolmaıdy. 

- «SSS STORY GROUP» JShS qysqy mezgilde avtokólikterdiń kedergisiz qozǵalysyn qamtamasyz etý maqsatynda atalǵan jolda kútip ustaý jumystaryn júrgizedi. Buǵan mynalar jatady: jol bóligin qar men muzdan tazartý, joldyń júris bóligin jáne jıegin qardan arshý, sondaı-aq qum-tuz qospasyn sebý, - dep qosty M.Qýanshalıev.

Eske sala keteıik, budan buryn BQO-da tenderdi jeńip alǵan depýtattyń kompanııasy jol salmaı otyrǵanyn jazǵan edik. 

Sondaı-aq Batys Qazaqstanda joldyń shala-sharpy salynýyna baılanysty ákimdik jaýap berdi.