Shúmenovtiń Astanadaǵy jekpe-jegin kim ótkizetini belgili boldy
ASTANA. QazAqparat - 7 shilde kúni Astanada jekpe-jek ótkizetin qazaqstandyq boksshy Beıbit Shúmenov el boksyn damytý máseleleri týraly oı bólisti, dep habarlaıdy «SPORTINFORM» SAA.
«Kózime jasatqan otanyń ekeýi de sátti ótkennen keıin dárigerler rıngke oralýyma ruqsat etti. Men burynnan Qazaqstanda kásibı boksty damytýdy armandap kelemin. Bizde myqty sportshylar kóp, Qazaqstan boks mektebin búkil álem úzdikter qatarynda moıyndaıdy. Biraq áýesqoı boks arqyly álemge tanylý qıyn. Máselen, Vasılıı Lomachenko kásipqoı boksqa barǵan soń ǵana ony álem tanydy. Áıtpese, oǵan deıin-aq eki dúrkin Olımpıada chempıony edi. Biz de Qazaqstandy kásipqoı boks arqyly tanytaıyq», - deıdi Shúmenov.
Boksshy, sondaı-aq Astanadaǵy jekpe-jeginiń rıng-anonseri kim bolatynyn da aıtty. «Jekpe-jekti Djımmı Lennon júrgizedi. Men 2007 jyldan beri Amerıkada boldym. Bul maǵan boks áleminiń tanymal tulǵalaryn Qazaqstanǵa shaqyrýǵa múmkindik beredi», - dedi boksshy.
