Shúmenov - has batyrdyń ózi, men ony úlgi tutamyn - Qanat Islam
ASTANA. QazAqparat - Qazaqstandyq boksshy Qanat Islam búgin ǵana WBA nusqasy boıynsha birinshi aýyr salmaqta «turaqty» álem chempıony tıtýlyn jeńip alǵan Beıbit Shúmenovti jeńisimen quttyqtady.
«Búgin óte jaqsy kún boldy. Tań jaqsy jańalyqpen bastaldy. Men tez arada Beıbitke habarlasyp, jeńisimen quttyqtadym. Shúmenovtiń búgingi jeńisimen barsha qazaqstandyqtardy quttyqtaımyn! Onyń árdaıym jeńiske jetip, elimizdiń kók baıraǵyn kótere berýine tilektespin», - dedi Qanat Islam.
«Shúmenovtiń boks taǵdyry óte qıyn. Ol jattyqtyrýshysyz, menedjer men promoýtersiz boldy. Boks áleminde oǵan talaı ret qıyndyqtar kezdesti. Áıtse de ol moıymady. Men ony osy qıyndyqtarǵa moıymaǵany úshin qatty qurmetteımin. Men ony úlgi tutyp, elikteımin. Qasynda qansha kómekshileri júrse de ol jetken jetistikterge jete almaı júrgender bar. Men úshin ol naǵyz batyr ispettes. Men onymen sóılesken kezde ol maǵan erteń-aq sharshy alańǵa shyǵýǵa daıyn ekendigin aıtty. Adamdar rıngke shyǵý úshin aılap daıyndalady ǵoı, bul Beıbittiń daıyndyǵynyń óte joǵary deńgeıde ekenin kórsetedi. Jáne kez kelgeni bundaıdy aıta almaıdy da», - dedi Qanat Islam.
Eske sala keteıik, Qazaqstandyq boksshy Beıbit Shúmenov amerıkalyq bokshsy Djýnıor Raıtty jeńip, WBA nusqasy boıynsha birinshi aýyr salmaqta «turaqty» álem chempıony tıtýlyn jeńip aldy. Endi Beıbit Shúmenov jáne Reseı bylǵary qolǵap sheberi Denıs Lebedev aldaǵy 120 kún ishinde ózara jekpe-jek uıymdastyrýy kerek, dep habarlady Vesti.kz.
