Shúmenov Astanadaǵy boks keshin uıymdastyrýdaǵy qarjylyq qıyndyqtardy aıtty

ASTANA. QazAqparat - Búkilálemdik boks qaýymdastyǵy basshylarynyń Astanada ótkizgeli otyrǵan WBA Dırektorlar keńesi álemdik boks pen estarada juldyzdarynyń qatysýynsyz ótýi múmkin. Bul týraly tilshilerge qazaqstandyq boksshy Beıbit Shúmenov málim etti, dep habarlaıdy QazAqparat tilshisi.

WBA Dırektorlar keńesi Shúmenovtyń boks keshi aıasynda 1-3 shilde aralyǵynda ótpek. Qazaqstan kásipqoı boks federatsııasy VKontakte jelisinde habarlaǵandaı, ony uıymdastyrýda eki salmaq sanaty boıynsha Qazaqstannan shyqqan tuńǵysh ári jalǵyz álem chempıony kóptegen kedergilerge tap bolýda. Boksshy kóptegen juldyzdardyń elordaǵa kelýge ýádesin alǵan. Biraq mınıstrlik tarapynan qarjylandyrýdyń keshiktirilýinen másele qıyndyqtarǵa tirelýde.  Al boks keshiniń ótýine az ýaqyt qalyp otyr.

Aıta keterligi, 7 shilde kúni Astanada kásipqoı boks keshi ótetini josparlanǵan. Kesh aıasyndaǵy basty jekpe-jek Beıbit Shúmenov (17-2, 11KO) pen túrik boksshysy Hıznı Altýnkaıdyń (30-1, 17KO) arasynda bolady. Olar WBA nusqasy boıynsha birinshi aýyr salmaqtaǵy álem chempıony tıtýlyn sarapqa salady.

Beıbit Shúmenovtyń aıtýyna qaraǵanda, boks juldyzdarynyń barlyǵyna shaqyrtý joldanǵan.

«Máselen, Jan Paskal, Lýchıan Býte, Hýan Manýel Markes, Erık Morales, Marko Antonıo Barrera, Hýlıo Sezar Chaves - búgingi deıin keletinderin rastaǵan boksshylar. Sonymen birge, meniń dostarym Horhe Lınares pen Devıd Heı da kelgeli otyr. Biraq, qarjylyq turǵyda qıyndyqtar paıda boldy. Mádenıet jáne sport mınıstrligi konventsııany tolyǵymen ózderine alatynyn aıtqan edi. Biraq sońynda qarjylandyrý jaǵynan  azdap keshýildep jatyrmyz. Bıletterdiń baǵasy qymbat. Barlyǵyn da alyp kelý úshin 200 myń dollar kerek», - deıdi boksshy.

Shúmenovtyń sózine sensek, áıgili ánshi 50 Cent atalǵan sharaǵa ózi qyzyǵýshylyq tanytqan.

«Biraq, keıin onyń agentteri bizge shyǵyp, tym kóp somany suraı bastady. Álbette, biz birden bas tarttyq. Biraq, meniń dosym Jan Paskal 50 Cent-pen jaqyn aralasady. 50 Cent kelýin kelgisi keledi-aq, másele olardyń agentterinde bolyp otyr. Qazaqstan mundaı oryndaýshylarǵa óte kóp aqsha tóleıdi, sondyqtan sheteldikter keıde juldyzdary arqyly Amerıkadaǵydan da zor tabys tapqysy keledi. Sol sebepti agentter qoldan kedergi jasap otyr. Qysqasy, Roı Djonstyń da «jyry» osy. Men ony dosym Álıhan Jarylǵapov arqyly shaqyrdym. Ol: «Beıbitke aıt, Qazaqstanǵa qýana-qýana baramyn» depti. Odan keıin Roı Djonstyń agentteri: «Oǵan nelikten tikeleı baılanysasyz? Sizder biz arqyly baılanysýyńyz kerek. Qansha aqsha tóleýge daıynsyz?» dep shyǵa keldi. Sondyqtan, ashyǵyn aıtaıyn - atalǵan juldyzdardyń keletinine jaýap bere almaımyn», - dedi ol.