Shýmaher daýysynan aırylyp, múgedek bolyp qalýy múmkin
ASTANA. 4 qańtar. QazAqparat - Taý shańǵysy kýrortynda shańǵy teýip júrip, qulap, bassúıek-mı jaraqatyn alǵan áıgili nemis avtoshabandozy Mıhael Shýmaherdiń denesi jartylaı sal bolyp jáne daýysy shyqpaı qalýy múmkin. Bul týraly burynǵy «Formýla-1» shabandozy frantsýzdyq Fılıpp Streıftiń sózderine silteme jasaı otyryp, Lenta.ru habarlaıdy.
Saıttyń málimetinshe, Frantsııadaǵy Merıbel taý shańǵysy kýrortynda Shýmaher shańǵy teýip júrip, tasqa basymen qulaǵan. Sonyń saldarynan qorǵaýshy shlemi qaq jarylyp, basynan qatty jaraqat alǵan. Keshe ǵana 45 jasqa tolǵan shabandoz birneshe kúnnen beri Grenobl aýrýhanasynda es-tússiz jatyr.
«Men Jerar Salıanmen (Mı ınstıtýtynyń basshysy) sóılestim. Olar Shýmaherdiń mıyn kún saıyn skanerlep otyrǵan kórinedi. Dúısenbi kúni mıynyń eki jaǵynda da gematoma bolǵan, al qazir sol jaǵyndaǵysy ǵana qalypty. Alaıda ol tez arada jazylmasa, sonyń áserinen naýqastyń denesiniń oń jaǵy sal aýrýyna urynýy múmkin eken. Ondaı jaǵdaıda Shýmaher dybys shyǵarý qabiletinen de aıyrylyp qalýy múmkin. Degenmen, em qabyldaý kezinde ol sal aýrýynan da aıyǵyp, daýysyn da qalpyna keltiredi dep úmittenemin», - dedi Streıff.
