Shúlbi sý qoımasynan 6,32 mlrd tekshe metr sý jiberildi
ASTANA. KAZINFORM — Bıyl Shyǵys Qazaqstan oblysyndaǵy Shúlbi sý qoımasynan Ertis ózeni arqyly ekologııalyq maqsattaǵy sý jiberý sharalary aıasynda shamamen 6,32 mlrd tekshe metr sý jiberildi. Bul týraly Sý resýrstary jáne ırrıgatsııa mınıstrligi málim etti.
Vedomstvo mınıstri Nurjan Nurjigitov Ertis basseındik ınspektsııasynyń 2025 jyldyń toǵyz aıynda atqarylǵan jumysy týraly esebin tyńdady. Sýdyń ekologııalyq maqsatta jiberilýi nátıjesinde Pavlodar oblysynda shamamen 305 myń gektar jer sýaryldy. Bul byltyrmen salystyrǵanda 27,5 myń gektarǵa artyq.
Bıyl Ertis basseındik ınspektsııasynyń mamandary sý zańnamasynyń saqtalýyn baqylaý maqsatynda 58 tekserý júrgizip, 25 mln teńge kóleminde 52 ákimshilik aıyppul saldy. 2025-2027 jyldarǵa arnalǵan ózender men kólderdi sanatsııalaý jónindegi jol kartasy aıasynda Abaı oblysynda uzyndyǵy 15 shaqyrymdy quraıtyn Kindikti men Kókpekti ózenderiniń ýchaskelerin tazartý jumystary aıaqtaldy.
– Ekologııalyq maqsatta sý jiberý jumystary jyl saıyn ekojúıeler men bıologııalyq alýan túrlilikti saqtaý, sondaı-aq sý nysandaryn lastanýdan jáne taýsylýdan qorǵaý maqsatynda júzege asyrylady. Budan bólek, sý jiberý arqyly shalǵyndyqtar men tabıǵı jaıylymdar sýarylady. Bul mal sharýashylyǵynyń jem-shóp qoryn qamtamasyz etip, aýyl sharýashylyǵynyń damýyna yqpal etedi, – dedi Ertis basseındik ınspektsııasynyń basshysy Medet Jádigeruly.
Aıta keteıik, Ertis basseıni aýmaǵynda zańsyz salynǵan 13 nysan joıylady.