Shúkirbulaq jáne Aıýsaı bógetteriniń qurylysy qalaı júrip jatyr

ALMATY. QazAqparat – Almaty qalasyna jumys saparynyń birinshi kúni Tótenshe jaǵdaılar mınıstri Syrym Sháriphanov Qorǵas ózeninde jáne Úlken Almaty ózeniniń basseıninde salynyp jatqan selden qorǵaý qurylystarynyń barysymen tanysty, dep habarlaıdy QazAqparat vedomstvo saıtyna silteme jasap.

«Shúkirbulaq» sel ustaıtyn bógettiń qurylysy Memleket basshysynyń tapsyrmasyn jáne Qazaqstan Respýblıkasy men Qytaı Halyq Respýblıkasynyń Úkimetteri arasyndaǵy Qorǵas ózeninde birlesken sel ustaıtyn bóget salýdaǵy yntymaqtastyq týraly kelisimdi iske asyrý sheńberinde júzege asyrylady.

Bógettiń sel saqtaý syıymdylyǵy – 10 mln tekshe metr, bıiktigi – 50,70 metr, uzyndyǵy – 534 metr. Baıandalǵanyndaı, qazir Qazaqstan tarapynan obekti 80%-ǵa daıyn.

Qurylys barysymen tanysqannan soń Syrym Sháriphanov jaýapty qurylymdarǵa jumystyń sapaly oryndalýyn qamtamasyz ete otyryp, qarqyndy jedeldetý jóninde tapsyrmalar berdi.

Bul halyqaralyq joba bolǵandyqtan, qorǵaý qurylystary Qazaqstan Respýblıkasynda da, Qytaı Halyq Respýblıkasynda da tek Qorǵa ózeniniń jaǵalarynda ornalasqan eldi mekenderdiń ǵana emes, sonymen qatar ınfraqurylym obektileriniń de (kópirler, avtojoldar, elektr berý jelileri, gaz jáne munaı qubyrlary, temir joldar jáne t.b.) qaýipsizdigin qamtamasyz etetin bolady.

Qazaqstan bóligindegi transshekaralyq Qorǵas ózeniniń joǵarǵy aǵysynda 40 muzdaq kól, al Qytaı bóliginde 20-ǵa jýyq kól ornalasqan. Qorǵas ózeni sel qaýpiniń birinshi sanatyna jatady. Onyń negizgi sý jınaý alańy 9 baldyq seısmıkalyq aımaqta ornalasqan.

Almaty úshin mańyzdy obekt – Úlken Almaty ózeniniń basseınindegi «Aıýsaı» sel ustaıtyn bógettiń qurylys barysy da mınıstrdiń jeke baqylaýynda. Bóget salynyp jatqan jerde «Qazseldenqorǵaý» MM basshysy Qaırat Bekenov mınıstrge jumystardyń aıaqtalý satysynda ekenin habarlady. Syrym Sháriphanov «Qazseldenqorǵaý» MM men qurylys uıymynyń basshylyǵyna qurylys-montajdaý jumystarynyń sapasy men merzimderin qatań saqtap, qurylysty belgilengen merzimde aıaqtaý qajettigi týraly tapsyrma berdi.

«Aıýsaı» bógetiniń qurylysy sel tasqynynan bolatyn qaýipti barynsha azaıtýǵa múmkindik beredi. Ol Almaty qalasyndaǵy Bostandyq, Almaly aýdandarynyń halqy men obektilerin senimdi qorǵaýdy qamtamasyz etedi.

Joba boıynsha bóget bıiktigi 41 metrden asady, sel saqtaý kólemi – 2,3 mln tekshe metr.

Úlken Almaty jáne Aqsaı ózenderiniń basseınderi sel qaýpiniń birinshi sanatyna jatady. Tek Úlken Almaty ózeniniń basseıniniń ózinde ǵana 89 muzdyq, 20 muzdaq-muzdyq kólder men Úlken Almaty kóli ornalasqan.

Qorǵalatyn aýmaq (Úlken Almaty ózeniniń ańǵarynda) – ulttyq tabıǵı parktiń bóligi, onda Almaty GES kaskadynyń obektileri, Almaty avtojoly – Úlken Almaty kólderi ornalasqan, sondaı-aq kóptegen demalys aımaqtary, dámhanalar men meıramhanalar salyndy, olar jumys istep jatyr.