Shúkir Shahaıdyń fotoalbomy jaryq kórdi
Elordanyń keshegisi men búgingisi, onyń erteńgi qadamy respýblıkaǵa belgili fotojýrnalıst, kóp jyldan beri QR Premer-Mınıstriniń jeke fotografy qyzmetin atqaryp júrgen Shúkir Shahaıdyń «Jan júregim - Astana» atty kitap-fotoalbomynda jan-jaqty kórsetilgen. Elimizdiń bas qalasy Astananyń 20 jylǵy tarıhyn osy fotoalbom arqyly kóz aldyńyzǵa elestetýge bolady.
Fotoalbom taqyryptarǵa talǵammen ári mazmunmen bólingen. Fotoalbom Astananyń órkendeýi - Qazaqstannyń órkendeýi degen uǵymdy tereń ashyp, sýretter arqyly elordanyń mańyzdylyǵyn, alatyn ornyn, mártebesin aıqyndaı túsedi. Kópshilikke arnalǵan fotoalbom 3 myń danamen jaryq kórgen.
Aıta keteıik, Shúkir Shahaı 1966 jyly 13 maýsymda dúnıege kelgen. Ońtústik Qazaqstan oblysy Jetisaı qalasyndaǵy Syrdarııa ýnıversıtetin, Shymkent qalasyndaǵy Qazaq gýmanıtarlyq zań ýnıversıtetin bitirgen. Eńbek jolyn Ońtústik Qazaqstan oblysy Kırov (qazirgi «Maqtaaral») aýdandyq «Komýnıstik eńbek» gazetinde fototilshi bolyp bastaǵan. Odan keıin 1990 jyly respýblıkalyq «Halyq keńesi», 1990-1996 jyldary jalpyulttyq «Egemen Qazaqstan» gazetinde fototilshi bolyp eńbek etti. Sondaı-aq respýblıkalyq «Jas Alash», halyqaralyq «Túrkistan» gazetinde de jumys istedi. 2002 jyldan beri Qazaqstan Respýblıkasy Premer-Mınıstriniń fotografy bolyp isteıdi.
«Astanaǵa - 10 jyl», «Táýelsizdikke - 20 jyl», «Konstıtýtsııaǵa - 20 jyl» medaldarynyń jáne Qazaqstan Respýblıkasy prezıdentiniń Qurmet gramotasynyń ıegeri.
«Qazaqstan», «Qasym Qaısenov», «Roza Rymbaeva», «Túrkistan», «Qazaqtyń kıiz úıi», «Maqtaaral», «Jer jannaty - Jetisaı», «Shejireli Shardara», «Táýelsizdik: Qas qaǵym sát», «Elbasy mártebesi - el mártebesi», «Astana: Qas qaǵym sát», «Egemendik aınasy», «Eldiń baǵy», «Qudaıbergen Sultanbaev», «Táýelsizdik», «Astana - Qazaqstannyń júregi» atty fotoalbomdardyń, Astana qalasynda ótken «Táýelsizdikke - 20 jyl», «Elbasy mártebesi - El mártebesi» atty fotokórmelerdiń avtory. Qazaqstan Respýblıkasy Jýrnalıster odaǵynyń laýreaty.
