«Shuǵyla», «Mura» jýrnaly Manasqa keldi - Sheteldegi qazaq tildi BAQ-qa sholý
Qysqy saıahat kórmesi Altaıda ashyldy - «Jenmın jıbao» (People Daily)
Qytaıdyń Altaı qalasyndaǵy aımaqtyq sport saraıynda Shyńjańnyń XIV qysqy týrıstik kórmesi ashyldy, - dep habarlaıdy kazakh.people.com.cn saıty.
Bul jolǵy týrıstik kórmeniń maqsaty - Jibek jolyn saıahattap, jergilikti halyqtyń ulttyq ónimderi saýdasyn jáne qysqy týrızm mádenıetin damytý.
Aıta ketý kerek, Shynjań qysqy týrızm kórmesi 2006 jyldan beri, úzdiksiz 13 ret ótkizilgen bolatyn.
Ózbekstandaǵy kásipkerlerge kedergi bolǵan úsh negizgi problema anyqtaldy - «ÓzA» aqparattyq agenttigi
Ortalyq saılaý komıssııasyndaǵy Halyqaralyq baspasóz klýbynyń kezekti baspasóz máslıhatynda kásipkerliktegi ózekti máseleler týraly aıtyldy, dep habarlaıdy Ózbekstannyń «ÓzA» memlekettik aqparattyq agenttigi.
Onda, Ózbekstandaǵy kásipkerlerdiń kásibin nyǵaıtý men jumysyn jandandyrýǵa kesirin tıgizip bıznesine tusaý bolyp tuǵan negizgi úsh másele kóterilip, sol jaıynda pikirtalas órbidi. Qazirgi kezdegi ózekti sanalatyn kásiptiń damýyna kederginiń eń negizgisi jer alý, bankterden kredıt alý men kommýnıkatsııalar jáne gaz, elektrlik jaǵdaıy óte ózekti bolyp otyr, dep jazady ózbekstandyq BAQ.
«Halyqaralyq baspasóz klýbynyń kezekti baspasóz máslıhatyna Ózbekstan Respýblıkasy Joǵary Májilisiniń Zań shyǵarý palatasynyń, saıası partııalardyń, Saýda-ónerkásip palatasynyń ókilderi, bıznes-ombýdsmender men kásipkerler qatysýda. Baspasóz máslıhaty jalǵasýda», - dep túıindeıdi «ÓzA».
«Shuǵyla», «Mura» jýrnaly Manasqa keldi - Qytaıdyń «Ortalyq halyq radıosy» (CNR)
Qazaq tilinde shyǵatyn ádebı jýrnal «Shuǵyla» men tarıhı mádenıettiń joqtaýshysy «Mura» jýrnalynyń redaktsııa basshylary osy aptada Manas aýdanyna baryp jýrnaldyń turaqty avtorlarymen jáne oqyrmandarymen kezdesý ótkizdi, dep habarlaıdy Qytaıdaǵy kazakcnr.com saıty.
Atalǵan BAQ-tyń málimetine súıensek, bul jolǵy is-shara Shyńjań ólkesiniń ádebıet-kórkemóner qoǵamynyń quryltaıshylyǵymen shyǵatyn «Shuǵyla» jáne «Mura» jýrnaldarynyń taralymyn kóbeıtip, oqyrman suranysyna saı sapaly basylymǵa aınaldyrý úshin uıymdastyrylǵan.
Qos jýrnal basshylyǵy redaktsııa qyzmetin úlken jaýapkershilikpen isteýdi, jýrnaldyń sapasy, shyǵarma ómirsheńdigimen baılanysty ekenin, redaktsııa men avtorlar qarym-qatynasyn kúsheıtý arqyly oqyrman sanyn arttyrýǵa bolatyny syndy mazmundardy keńinen baıandady. Jergilikti avtorlardan «Shuǵyla», «Mura» jýrnalyna joldanǵan usynys pikirlerin tyńdady. «Mura» jýrnalynyń ókili Qamıt Zámerhanuly da óz jýrnaly týraly keńinen aıta kelip, basylym sapasynyń avtorlarmen tike qatysty ekenin aıtty. El arasynda áli kúnge jaryqqa shyǵyp úlgermegen tarıhı aqyndar aıtysy, ańyz-áńgimeler, sheshendik sózder, ázil-qaǵytpalar, qıssa-dastandar sııaqty jaquttardy jınaý, retteý, jýrnalǵa berý jaqtarynda avtorlarmen oı bólisti.
«Jýrnaldar redaktsııasynyń Manas aýdanyndaǵy qazaq qalamgerlermen júzdesip úgit-násıhat júrgizýi, ózara pikir almasýy manastyq qazaq aqyn-jazýshylaryn sapaly týyndy jasaýǵa shabyttandyrdy. Ásirese, qos jýrnaldyń bul sapary Manas sekildi qazaqtary kóp aýdannyń mádenıeti men ádebıetiniń ári qaraı damýyna tamasha bastama boldy», - dep túıindeıdi atalǵan basylym.
Iran, Qazaqstan men Japonııa karateden álemniń eń úzdik úshtigine endi – «Fars» aqparat agenttigi
Erler arasyndaǵy Irannyń ulttyq karate komandasy 2019 jylǵy álemniń eń úzdik komandasy atandy, dep habarlaıdy parstoday aqparat agenttigi.
Atalǵan aqparat kóziniń habarlaýynsha, erler arasyndaǵy Irannyń ulttyq karate komandasy «Karate One» premer-lıga týrnıriniń 2019 jylǵy 7 kezeńinde 7 altyn, 10 kúmis, 13 qolamen jalpy 30 medal alyp, álemniń karate komandalary arasynda eń úzdik komanda atanǵan.
«Irannan keıin Qazaqstan komandasy 6 altyn, 3 kúmis, 7 qolamen jalpy 16 medal alyp, ekinshi oryn alsa, Japonııa álem karatesindegi eń myqty dástúrli komanda retinde 5 altyn, 2 kúmis, 6 qolamen jalpy esepte 13 medal alyp, úshinshi orynǵa taban tiredi», dep túıindeıdi ırandyq BAQ.
1500 jyldyq tarıhy bar shyraqtar tabyldy - TRT
Dııarbakyrdyń (Túrkııanyń ońtústik-shyǵysyndaǵy qala) Chynar aýdany mańynda Zerzevan qamalynda júrgizilgen qazbalarda Rım dáýirinen qalǵan 1500 jyldyq tarıhy bar 48 dana shyraq jaryqqa shyqty, dep jazady Túrkııa Radıo Televızııa portaly.
Atalǵan aýdanǵa 13 km qashyqtyqtaǵy Zerzevan qamaly Rım ımperııasy kezinde áskerı baza retinde qoldanylǵan. Osy jerde Túrkııa Respýblıkasy Mádenıet jáne týrızm mınıstrliginiń bastamasymen qolǵa alynǵan qazba bes jyldan beri jalǵasyp kelgen.
«Bunda bıiktigi 12-15 metr, uzyndyǵy 1200 metrlik qorǵan qaldyǵy, bıiktigi 21 metr baqylaý jáne qorǵanys munarasy bolǵan. Sondaı-aq, shirkeý, basqarý ǵımaraty, turǵyn úıler, daqyl jáne qarý qoımalary bolǵany anyqtaldy. Buǵan qosa jer asty ǵıbadathanasy, jartas qabirleri, sý kanaldary jáne 54 sý qoımasy bar qamal myńdaǵan jyldyq tarıhty ashyp beredi», dep jazdy túrkııalyq BAQ.
