ShUǴYL: Jer resýrstaryn basqarý agenttiginiń basshylyǵyna qatysty qylmystyq isti tergeý aıaqtaldy, Ózbekov úıqamaqta - Qarjy polıtsııasy
ASTANA. 5 sáýir. QazAqparat - Jer resýrstaryn basqarý agenttiginiń basshylyǵyna qatysty qylmystyq isti tergeý aıaqtaldy.
Bul týraly búgin QR Ekonomıkalyq qylmysqa jáne sybaılas jemqorlyqqa qarsy kúres agenttiginiń resmı ókili Murat Jumanbaı málim etti.
Onyń atap ótýinshe, qarjy polıtsııasy Jer resýrstaryn basqarý agenttiginiń burynǵy tóraǵasy Ózbekovke, onyń orynbasarlary Naqypbekov pen Janpeıisovke, sonymen qatar agenttiktiń jáne vedomstvoǵa qarasty basqa da laýazymdy tulǵalarǵa qatysty bıýdjetten topografııalyq jáne kartografııalyq ónimge, onyń ishinde Kaspıı teńiziniń qazaqstandyq sektoryndaǵy teńiz kartasyn qurýǵa bólingen 906 mln. teńgeni urlaý faktisi boıynsha qylmystyq istiń tergeýi aıaqtaldy. Atalǵan aqshalaı qarajat teńiz kartasyn jasaý boıynsha jumystardyń bir bóligin eki ret qarjylandyrý jolymen jáne «Kazgeodezııa» respýblıkalyq memlekettik qazynalyq kásiporny fılıaldarynyń jáne onymen baılanysty kásiporyndarmen jalǵan fırmalardyń esep-shottaryna aýdarý arqyly qolma qol aqshaǵa aınaldyrý jolymen urlaǵan. «Ózbekovke qatysty sottyń sanktsııasymen úı qamaýynda ustaý túrindegi bultartpaý sharasy taǵaıyndaldy. Onyń orynbasary Naqypbekov sot sanktsııasymen qamaldy. Janpeıisovten eshqaıda ketpeý týraly qolhat alyndy. Sonymen qatar bıýdjet qarajatyn urlady degen aıyppen sot sanktsııasymen «Kazgeodezııa» dırektory Qaıymbekov qamaýda jatyr. Agenttiktiń Geodezııa jáne kartografııa departamentiniń bastyǵy Saǵyndyqovtn eshqaıda ketpeý qolhat alyndy»,- dedi ol.
Qarjy polıtsııasynyń resmı ókiliniń atap ótýinshe, qazirgi tańda aıyptalýshylardyń qorǵaýshylaryn qylmystyq ispen tanystyrý sharasy júrgizilýde.
