ShUǴYL: Jeke tulǵalar úshin kólik rásimdeýdegi kedendik jeńildik 30 maýsymda aıaqtalady
ALMATY. 8 maýsym. QazAqparat /Erlik Erjanuly/ - 2010 jyldyń maýsymynan bastalǵan Qazaqstan azamattaryna shetten kólik ákelýge berilgen jeńildik 1 shildede aıaqtalady.
Bul týraly Almaty qalalyq kedendik baqylaý departamenti bastyǵynyń orynbasary Baqyt Tynysbekov búgin ótken baspasóz máslıhatynda aıtty.
«Jeke tulǵalar úshin kólik rásimdeýdegi kedendik jeńildik 30 maýsymda aıaqtalady. 30 maýsymnan keshikkender 1 shildeden bastap kólikterin Keden odaǵynanyń biryńǵaı kedendik mólsherlemesi boıynsha rásimdeıtin bolady. Qujatty rásimdeýde kóliktiń shekaradan ótken kúni emes, ony keden beketine rásimdeýge tapsyrǵan kún ǵana esepteledi», - deıdi Baqyt Tynysbekov.
Jalpy 2010 jyly Almaty qalalyq kedendik baqylaý departamentinde 21 458 kólik kedendik rásimdeýden ótken. Bıyl 5 aıdyń ózinde bul san 23 337-ge deıin jetken.
Onyń aıtýynsha, kólikteri shet elde túrli sebeptermen bógelip qalǵan azamattarǵa 1 shildeden keıin eshqandaı jeńildik berilmeıdi. 2010 jyly 1-shildedegi №682 Úkimet qaýlysy boıynsha jeke tulǵalar úshin jeńil kólik ákelýde 3-10 jyl aralyǵynda shyqqan kólik dvıgateliniń kólemine qaraı 1 tekshe sm. úshin kedendik alym men salyqtyń jeńildetilgen mólsherlemesi 0,35-ten 0,6 eýro kóleminde belgilengen edi. Shilde aıynan bastap shyqqanyna 5 jyldan asqan dvıgateli 1800-den 3000 tekshe sm. deıingi kólikterdiń kedendik alymynyń mólsherlemesine ár tekshe úshin 4 eýro jáne oǵan 12 paıyzdyq qosymsha qun salyǵy qosylmaq. Máselen, 2007 jyly shyqqan dvıgateliniń kólemi 1800 tekshe sm. bolatyn Toıota korollla kóliginiń jalpy tólemi qazir 151 myń 200 teńge bolsa, 1 shildeden keıin ol 1 mln. 091 myń 597 teńgeni quramaq.
