ShUǴYL: «Jaýjúrek myń bala» fılmi «Oskar» syılyǵyna usynylýy múmkin
ALMATY. 7 tamyz. QazAqparat - «Jaýjúrek myń bala» fılmi 17-22 qyrkúıek kúnderi Almatyda ótetin VIII «Eýrazııa» halyqaralyq kınofestıvaliniń baǵdarlamasyna engizildi.
Bul týraly festıvaldiń prezıdenti Ermek Amanshaev búgin Almatyda ótken baspasóz máslıhaty kezinde aıtty.
«Sońǵy jyldary álemdik kınoındýstrııa ınstıtýttarynyń Qazaqstanǵa degen qyzyǵýshylyǵy óte joǵary. Bizdiń fılmderimiz kóptegen mártebeli kınofestıvaldarǵa qatysýda. «Eýrazııa» kınofestıvaliniń munda óz orny bar. Bıyl bul sharaǵa álemdik kınoındýstrııa ınstıtýttarynyń jetekshileri qatysqaly otyr. Olardyń arasynda Frantsııanyń ulttyq kınematografııa qorynyń prezıdenti, Reseı kınoqorynyń basshysy, «Altyn globýs» syılyǵynyń prezıdenti bar», - deıdi E.Amanshaev.
Onyń aıtýynsha, «Altyn globýs» «Oskar» men «Gremmı» syılyǵynan keıingi úshinshi orynda turǵan eń mártebeli syılyqtardyń biri. Onyń laýreattarynyń úshten ekisi keıin «Oskar» syılyǵynyń ıegerleri atanyp júr. Sondyqtan osyndaı halyqaralyq ınstıtýttar arqyly Aqan Sataevtyń «Jaýjúrek myń bala» fılmin de «Oskarǵa» usyný múmkindigin qarastyrmaq.
3 mamyrda kıno naryǵyna shyǵarylǵan rejısser Aqan Sataevtyń «Jaýjúrek myń bala» fılmi alǵashqy úshkúndik kórsetiliminde 1 mıllıon dollar jınaǵan otandyq tuńǵysh týyndy. Sháken Aımanov atyndaǵy «Qazaqfılm» kınostýdııasynyń eń aýqymdy bul jobasyn júzege asyrý 3 jylǵa sozyldy. Ol 18-ǵasyrdyń basyndaǵy «Aqtaban shubyryndy, Alqakól sulama» kezeńinde jońǵarlarǵa qarsy qol jınap, jankeshtilik tanytqan órimdeı jas qyz-jigitterdiń taǵdyry týraly fılm. Onda basty jáne ekinshi dárejedegi 200 akterdy tańdaý maqsatynda jarııalanǵan kastıngke 22 myńnan astam úmitker qatysty.
