ShUǴYL: Vladıslav Chelah ózine-ózi qol salmaq boldy - Bas áskerı prokýratýra
ASTANA. 12 qazan. QazAqparat - Vladıslav Chelah ózine-ózi qol salmaq boldy, dep habarlady QR Bas áskerı prokýratýrasy.
«2012 jylǵy 11 qazanda saǵat 16-ǵa taman LA-155/16 mekemesiniń ishki kezekshisi kameralardy kezekti tekserý kezinde tergeýde jatqan tutqyndaǵy V.V. Chelah sporttyq shalbaryn tereze toryna baılap ózin asyp óltirýge áreket jasamaqshy bolǵanyn anyqtady. Mekeme ákimshiligi aldyn alý sharalaryn qolǵa aldy.
Bul derek Almaty oblysy ishki ister departamentiniń ótinishter men aqparattardy esepke alý kitabynda sýıtsıd jasaý áreketi retinde tirkeldi, ІІD qyzmetkerleri qazirgi ýaqytta tekserý sharalaryn júrgizýde.
V.V.Chelahtyń denesin tekserip qaraý barysynda zaqym kelmegen. Densaýlyq jaǵdaıy qanaǵattanarlyq jáne ol belgilengen keste boıynsha is materıaldarymen tanysýdy jalǵastyrýda», - delingen QR Bas áskerı prokýratýrasynyń habarlamasynda.
Eske sala keteıik, 30 mamyrda «Shyǵys» shekara qyzmeti aımaqtyq basqarmasynyń «Sary Bókter» shekaralyq zastavasynyń shekara jasaǵy jazǵy kezde 15 shekarashy qyzmet atqaryp jatqan «Arqankergen» shekaralyq beketiniń taýdaǵy ǵımaraty órtenip ketkenin kórgen. Órtenip ketken kazarma men ofıtserler úıin qaraǵan kezde 13 adamnyń órtengen múrdesi anyqtaldy. Órtengen máıittiń bireýi jaqyn mańdaǵy ózen jaǵasynan tabyldy. Budan basqa, «Arqankergen» beketinen 150 metr jerdegi ańshylyq sharýashylyǵynyń kúzetshisi úıinen avtomattan birneshe ret atylǵan oqtan óltirilgen Rýslan Kımniń máıiti tabyldy.
4 maýsymda shekaralyq jasaq shopan qystaǵynan 1992 jyly týǵan, «Arqankergen» beketinde bolǵan shekarashylardyń biri Vladıslav Chelahty ustady. Onda azamattyq kıim, kapıtan Kereevtiń noýtbýgi men pıstoleti, sondaı-aq keıbir ólgen áskerı qyzmetshilerdiń uıaly telefondary bolǵan. Sol kúni advokattyń qatysýymen tergeý barysynda V.Chelah óziniń qyzmettesteri men Rýslan Kımdi óltirgenin moıyndady.
